ماسکو: گلے میں پہنی چین کی وجہ سے نوجوان فٹبالر پر آسمانی بجلی جا گری، خوفناک منظر کی ویڈیو نے سب کے دل دہلا دیے۔
بین الاقوامی میڈیا رپورٹس کے مطابق یہ واقعہ روس کے دارالحکومت ماسکو کے قریب اوریکھوزیو میں پیش آیا جہاں ٹریننگ کے دوران آسمانی بجلی فٹبالر پر جا گری۔
اوان زبورشکے نامی نوعمر گولر کیپر دیگر کھلاڑیوں سے الگ پریکٹیس کر رہا تھا کہ اس دوران جیسے ہی اس نے فٹبال کو کک لگائی تو گلے میں پہنی چین کی وجہ سے آسمانی بجلی کی لپیٹ میں آگیا۔
16سالہ فٹبالر کی چین دھات کی بنی ہوئی تھی جس کی وجہ سے وہ آسمانی بجلی کا نشانہ بنا، فٹبالر زمین پر گر گیا اور فوری طور پر اسے تشویشناک حالت میں اسپتال منتقل کیا گیا جہاں وہ زندگی اور موت کی کشمکش میں مبتلا ہے۔
ڈاکٹرز کا کہنا ہے کہ آسمانی بجلی گرنے کی وجہ سے نوجوان کی زندگی کو خطرات لاحق ہیں اور وہ کوما میں چلا گیا ہے جب کہ گردن کے گرد بجلی سے جھلسنے کے نشانات موجود ہیں۔
فٹبالر کی دوست نے میڈیا کو بتایا کہ اوان زبورشکے کی طبیعت میں کچھ بہتری آئی تھی اور اسے ہوش آیا تھا لیکن سخت تکلیف دہ جھٹکے کی وجہ سے وہ دوبارہ کوما میں صورتحال سے دوچار ہوگیا۔
