کراچی: شہر قائد کے علاقے قیوم آباد میں باپ نے بیٹے کو فائرنگ کرکے قتل کردیا۔
اے آر وائی نیوز کی رپورٹ کے مطابق کراچی کے علاقے کورنگی قیوم آباد میں سابق پولیس اہلکار بشیر نے بیٹے کو فائرنگ کرکے قتل کردیا اور فرار ہوگیا۔
پولیس کے مطابق مقتول کو تقریباً 5 گولیاں ماری گئیں، مقتول کی شناخت انیس کے نام سے ہوئی ہے۔
پولیس ذرائع کے مطابق مقتول کی لاش کو ضابطے کی کارروائی کے لیے اسپتال منتقل کردیا گیا ہے، پوسٹ مارٹم رپورٹ آنے کے بعد مزید تفصیلات سامنے آسکیں گی۔
مقتول کی والدہ کا موقف ہے کہ بیٹے کا رشتہ لے کر اتوار کو جارہے تھے لیکن اس رشتے پر شوہر کو اعتراض تھا اور انہوں نےجانے سے منع کیا تھا اس پر انہوں نے طیش میں آکر فائرنگ کرکے بیٹے کی جان لے لی۔
پولیس کا کہنا ہے کہ ملزم بشیر بیٹے کو قتل کرکے فرار ہوگیا، ملزم سابق پولیس اہلکار ہے، فرار ملزم کی تلاش میں چھاپے مارے جارہے ہیں۔
اسپتال ذرائع کے مطابق مقتول انیس کو 5 گولیاں ماری گئی ہیں جب مقتول لایا گیا تو وہ انتقال کرچکا تھا، ضابطے کی کارروائی جاری ہے۔
