اسلام آباد : وزیر اعظم عمران خان کی زیرصدارت اجلاس میں شوگر اور گندم مافیا کے خلاف کارروائیوں سے متعلق پیشرفت پر بریفنگ دی جارہی ہے۔
تفصیلات کے مطابق وزیر اعظم عمران خان کی زیرصدارت چینی اور گندم سے متعلق مشاورتی اجلاس جاری ہے، جس میں وفاقی وزرا، معاونین، مشیراحتساب اوراعلیٰ حکام شریک ہیں۔
اجلاس میں ملک میں گندم اور چینی کی صورتحال کا جائزہ لیا جارہا ہے جبکہ وزیراعظم کو ذخیرہ اندوزوں کے خلاف کارروائی اور صوبوں میں گندم اسٹاک کے حوالے سے آگاہ کیا جائے گا۔
ذرائع کے مطابق شوگر اور گندم مافیا کے خلاف کارروائیوں سے متعلق پیشرفت پر بریفنگ بھی دی جائے گی۔
اس سے قبل وزیر اعظم عمران خان نے شوگر مافیا کے خلاف کریک ڈاؤن کا فیصلہ کیا تھا اور کہا کہ حکمران خود ملوث نہ ہوں تو کرپٹ عناصر معاشرے میں پنپ نہیں سکتے۔
وزیر اعظم نے شوگر کمیشن رپورٹ کی بنیاد پر ایف بی آر، نیب، ایس ای سی پی اور ایف آئی اے کو تحقیقات کا حکم دے دیا ہے، اس حوالے سے مشیر برائے احتساب شہزاد اکبر نے گورنراسٹیٹ بینک، مسابقتی کمیشن اور 3 صوبوں کو بھی خطوط لکھ دیے ،جن کے ساتھ شوگر کمیشن رپورٹ بھی ارسال کی گئی ہے۔
وفاقی حکومت نے 90 روز میں عمل درآمد رپورٹ پیش کرنے کی ہدایت کی ہے، یاد رہے کہ وفاقی کابینہ نے 23 جون کو اس سلسلے میں ایکشن پلان کی منظوری دی تھی۔
