امریکی بائیو ٹیک کمپنی ماڈرینا کا کہنا ہے کہ انہیں امریکی حکومت کی جانب سے اضافی فنڈنگ موصول ہوئی ہے جس کی بدولت وہ اپنی کرونا وائرس ویکسین کی تیاری کا آخری مرحلہ جلد مکمل کرسکیں گے۔
ماڈرینا کو اپریل میں امریکی فیڈرل ایجنسی سے 483 ملین ڈالر کی فنڈنگ موصول ہوئی تھی، اس وقت ماڈرینا کی ویکسین اپنی تیاری اور آزمائش کے پہلے مرحلے میں تھی۔
ادارے کے چیف ایگزیکٹو آفیسر کا کہنا ہے کہ ابتدائی مرحلوں سے حاصل شدہ ڈیٹا سے اندازہ ہورہا ہے کہ ویکسین نہ صرف کرونا وائرس کی موجودہ صورتحال کو کنٹرول کرنے میں مدد دے گی بلکہ مستقبل میں بھی کسی وبا کے خلاف مؤثر کردار ادا کرے گی۔
اب تک ماڈرینا کو امریکی حکومت کی جانب سے955 ملین ڈالر کی فنڈنگ موصول ہوچکی ہے۔
ماڈرینا کا کہنا ہے کہ وہ فی الوقت ویکسین کی سالانہ 500 ملین ڈوزز بناسکتے ہیں اور انہیں امید ہے کہ سنہ 2021 کے آغاز سے 1 ارب ڈوزز سالانہ بناسکیں گے۔
