کراچی: عید الاضحیٰ کے موقع پر آلائشیں پھینکے جانے کے پیش نظر سول ایوی ایشن نے آگاہی مہم شروع کردی، سی اے اے کا کہنا ہے کہ آلائشوں کے پڑے رہنے سے پرندوں کی آمد بڑھ جاتی ہے جس سے طیاروں کو نقصان کا خطرہ ہوتا ہے۔
تفصیلات کے مطابق سول ایوی ایشن نے طیاروں اور ہوائی سفر کو پرندوں سے محفوظ بنانے کے لیے کوئٹہ، ملتان اور لاہور ایئر پورٹ پر آگاہی مہم شروع کردی۔
سول ایوی ایشن کی جانب سے اہم شاہراہوں پر بینر آویزاں کیے گئے ہیں جبکہ شہر میں پمفلٹ کی تقسیم بھی جاری ہے۔
سی اے اے کا کہنا ہے کہ کوشش ہے کچرے کے باعث آنے والے پرندوں سے طیاروں کو نقصان نہ پہنچے، آلائشوں کے پڑے رہنے سے پرندوں کی آمد بڑھ جاتی ہے۔
سی اے اے نے اپیل کی ہے کہ قومی اثاثوں اور فضائی سفر محفوظ بنانے کے لیے شہریوں کو کردار ادا کرنا ہوگا، عید الاضحیٰ پر جانوروں کی باقیات اور کچرا مقررہ جگہوں پر ہی پھینکیں۔
خیال رہے کہ ایئرپورٹ کے اطراف میں رہائشی آبادیوں میں کچرے کی وجہ سے پرندوں کا ایئر پورٹ پر آنا معمول بن گیا ہے، پرندوں کے ٹکرانے کی وجہ سے طیاروں کو بے تحاشہ نقصان پہنچتا ہے جس کے بعد طیاروں کی مرمت پر خطیر رقم خرچ ہوتی ہے۔
عید الضحیٰ کے موقع پر جگہ جگہ آلائشیں پھینکے جانے کے باعث بھی پرندوں کی تعداد میں اضافہ ہوجاتا ہے۔
