لندن: مریم نواز کے صاحب زادے جنید صفدر کی منگنی ہو گئی ہے۔
تفصیلات کے مطابق شریف خاندان کے ذرائع کا کہنا ہے کہ مریم نواز کے بیٹے جنید صفدر کی منگنی ہو گئی ہے، ان کی منگیتر یونی ورسٹی کالج آف لندن کی فارغ التحصیل ہیں۔
خاندانی ذرائع کا کہنا ہے کہ جنید صفدر کی منگیتر سابق سینیٹر سیف الرحمان کی صاحب زادی ہیں۔
دوسری طرف نیب نے رائیونڈ میں 200 ایکڑ زمین کی منتقلی کا الزام میں مریم نواز کو 11 اگست کو پیش ہونے کی ہدایت کی ہے، نیب نے سابق ڈی ای او نور امین مینگل، احد چیمہ سے بھی اس سلسلے میں تحقیقات کا فیصلہ کیا ہے، ذرایع کا کہنا ہے کہ 2014 میں رائیونڈ میں مریم نواز کے نام 200 ایکڑ زمین منتقل کی گئی تھی۔
مریم نواز کی نیب میں طلبی، سوال نامہ تیار
ذرایع کا کہنا ہے کہ مریم نواز کے نام 1440 کنال ارضی منتقل کی گئی، شریف خاندان کی جانب سے 2013 میں 3568 کنال اراضی خریدی گئی، سب سے زیادہ زمین 242 ایکڑ یعنی 1936 کنال شمیم بی بی کے نام تھی، مریم نواز کے نام منتقل زمین کا رقبہ کل 180 ایکڑ یعنی 1440 کنال تھا۔
ذرایع کے مطابق نواز شریف کے نام منتقل زمین 12 ایکڑ تھی جو 96 کنال بنتی ہے، شہباز شریف کے نام منتقل زمین کا رقبہ بھی 12 ایکڑ یعنی 96 کنال تھی۔
نیب ذرایع کا یہ بھی کہنا ہے کہ زمین منتقلی میں ایل ڈی اے کے قواعد و ضوابط کو نظر انداز کیا گیا، شریف فیملی کی زمین کے اردگرد تعمیرات کو روکنے کے لیے تمام رقبے کو گرین لینڈ قرار دیا گیا۔
مریم نواز کی 200 ایکڑ اراضی الاٹمنٹ کے معاملے پر نیب میں طلبی سے متعلق سوال نامہ بھی تیار کیا گیا ہے، جس میں کہا گیا ہے کہ زمین کی خرید و فروخت کی تمام تفصیلات فراہم کی جائیں، زمین کی خریداری کے لیے فنڈز کب اور کہاں سے دستیاب ہوئے، مذکورہ اراضی کی خریداری کے لیے ڈیوٹی، ٹیکس کی تفصیلات بھی دی جائیں، اراضی میں سے کوئی حصہ فروخت کیا گیا ہو تو اس کی تفصیلات فراہم کی جائیں، اراضی ایگری کلچر یا کمرشل استعمال میں آئی تو اس کی بھی تفصیلات دی جائیں۔
