پاکستان کے قومی ترانہ کی دھن کی منظوری کے بعد جب پاکستان کے نام ور اور مستند شعرا نے اس دھن سے ہم آہنگ ترانے تحریر کرکے اس ضمن میں متحرک کمیٹی کو ارسال کیے تو حفیظ جالندھری کے علاوہ حکیم احمد شجاع اور زیڈ اے بخاری کے تحریر کردہ بول سب سے زیادہ پسند کیے گئے۔
4 اگست 1954 کو پاکستان کی مرکزی کابینہ نے ممتاز شاعر حفیظ جالندھری کے ترانے کو پاکستان کے قومی ترانے کے طور پر منظور کرنے کا اعلان کیا اور پہلی بار 13 اگست کو یہ قومی ترانہ ریڈیو پاکستان سے نشر کیا گیا۔
13 اگست 1954 کو ملک بھر میں ریڈیو پاکستان پر پہلی مرتبہ اپنے ملک کا خوب صورت قومی ترانہ سننے والے ہر پاکستانی نے خوشی اور مسرت کا اظہار کیا اور قوم جذبہ حب الوطنی سے سرشار نظر آئی۔ اس سے قبل 1949 میں قومی ترانے کی دھن ریڈیو پاکستان پر ریکارڈ کی گئی تھی۔
قومی ترانہ کی دھن مشہور موسیقار احمد جی چھاگلہ نے مرتب کی تھی، جسے بہرام رستم جی نے اپنے پیانو پر بجایا اور ریڈیو پر ریکارڈ کی گئی۔
