لاہور : پنجاب میں 24 گھنٹوں کے دوران کورونا کے 28نئے کیسز رپورٹ ہوئے اور ایک شہری جاں بحق ہوا،جس کے بعد اموات کی تعداد 2198 اور کیسز کی تعداد 96769 ہوگئی۔
تفصیلات کے مطابق پنجاب میں کورونا کیسز اور اموات میں کمی کا سلسلہ جاری ہے ، پنجاب میں 24 گھنٹوں کے دوران کورونا کے28نئے کیسز سامنے آئے ، جس کے بعد مجموعی کیسز کی تعداد 96769 ہوگئی ہے۔
ترجمان ہیلتھ کیئر نے کہا ہے کہ لاہورمیں 12،گوجرانوالہ 3، بہاولپور میں 2،گجرات میں 1کیس ، فیصل آباد6، جھنگ ،سرگودھا میں بھی2،2 کیسز رپورٹ ہوئے۔
ترجمان کے مطابق کورونا سے مزید ایک شہری جاں بحق ہوا، جس کے بعد اموات کی تعداد2198 ہوگئی جبکہ کورونا کو شکست دینے والوں کی تعداد92481 تک جا پہنچی ہے۔
یاد رہے وزیراعلیٰ پنجاب سردار عثمان بزدار نے پنجاب میں کرونا کی صورت حال پر بیان جاری کرتے ہوئے کہا تھا پنجاب میں حکومتی اقدامات کے نتائج حوصلہ افزا ہیں، صوبے میں کرونا کے 2020کیسزرہ گئے جبکہ اب تک 2195 افراد کرونا سے جاں بحق ہوئے۔
وزیراعلیٰ نے مزید کہا تھا کہ محرم الحرام کے دوران بھی ایس او پیز پرعمل درآمد یقینی بنایا جا رہا ہے، کرونا ابھی ختم نہیں ہوا، عوام کو احتیاط کا دامن نہیں چھوڑنا چاہیے۔
