ابوظہبی: متحدہ عرب امارات کے وزٹ اور سیاحتی ویزا کے حامل افراد کو یاد دہانی کروائی گئی ہے کہ ان کے ویزا کی میعاد میں کی گئی ایک ماہ کی توسیع کے ختم ہونے میں 4 روز باقی رہ گئے ہیں۔
متحدہ عرب امارات نے مسافروں کی پریشانی دور کرتے ہوئے وزٹ ویزا کی میعاد میں ایک ماہ کی توسیع کی تھی۔
یہ اعلان وفاقی اتھارٹی برائے شناخت و شہریت کی جانب سے کیا گیا تھا جس کا نفاذ 11 اگست سے شروع ہوا تھا۔
اس اعلان کے بعد سے وہ افراد جن کے وزٹ ویزے کی میعاد ختم ہوگئی تھی وہ اب ایک ماہ کے اندر بغیر کسی جرمانے کے امارات سے جا سکتے ہیں۔
اب وفاقی اتھارٹی نے تازہ اعلان کیا ہے کہ وزٹ اور سیاحتی ویزا کی میعاد ختم ہونے میں 4 روز باقی ہیں اس مہلت میں ویزا ہولڈرز بغیر کسی جرمانے کے امارات سے واپس جاسکتے ہیں۔
ان ویزا ہولڈرز کو ایک آپشن بھی دیا گیا ہے کہ وہ امپلائمنٹ ویزا حاصل کر کے بغیر جرمانے کے امارات میں رہ سکتے ہیں یا پھر ویزے کی تجدید کروانے کی صورت میں بھی ان پر جرمانہ نہیں ہوگا۔
واضح رہے کی وزٹ ویزہ کی مدت پوری ہونے پر یو اے ای میں رہنے والے شخص پر پہلے روز 200 درہم اور ہر اگلے روز 100 درہم جرمانہ عائد ہوتا ہے۔
