نئی دہلی: بھارت میں ایک بس کا ڈرائیور دوران ڈرائیونگ بے ہوش ہوگیا لیکن اس نے حاضر دماغی سے کام لیتے ہوئے بس کو سائیڈ پر روک لیا جس سے مسافروں کی جانیں بچ گئیں۔
بھارتی میڈیا کے مطابق واقعہ بھارتی ریاست کرناٹک میں ریپڈ ٹرانزٹ سسٹم کی بس میں پیش آیا، ڈرائیور خون میں گلوکوز کی کمی ہوجانے والے مرض ہائپو گلائسیمیا کا شکار تھا جس کی وجہ سے اچانک اسے چکر محسوس ہونے لگے۔
اس وقت بس ایک پل پر موجود تھی، ایسے موقع پر بھی ڈرائیور نے اپنے حواس بحال رکھے اور بس کی رفتار کم کرتے ہوئے اسے ایک طرف روک دیا۔ جیسے ہی بس رکی ڈرائیور چکرا کر گر گیا۔
بس کے مسافر فوراً ڈرائیور کی طرف لپکے اور اس کی طبیعت کو دیکھتے ہوئے اسے اسپتال منتقل کیا۔
بھارتی میڈیا رپورٹ کے مطابق ڈرائیور کو طبی امداد دی گئی جبکہ مسافروں کو دوسری بس میں ان کی منزل کی طرف روانہ کردیا گیا، بعد ازاں طبی امداد کے بعد ڈرائیور کو بھی اسپتال سے ڈسچارج کردیا گیا۔
بس میں 40 کے قریب مسافر موجود تھے جو محفوظ رہے اور ڈرائیور کی حاضر دماغی نے انہیں حادثے سے بچا لیا۔