ویلنگٹن: نیوزی لینڈ کے فاسٹ بولر ٹرینٹ بولٹ نے قومی ٹیم کے سابق کپتان وسیم اکرم کو اپنا آئیڈیل قرار دے دیا۔
تفصیلات کے مطابق نیوزی لینڈ کے لیفٹ آرم فاسٹ بولر ٹرینٹ بولٹ نے سماجی رابطے کی ویب سائٹ انسٹاگرام پر ویڈیو سیشن میں ایک بار پھر سوئنگ کے سلطان وسیم اکرم کو اپنا آئیڈیل قرار دے دیا۔
ٹرینٹ بولٹ سے مداح نے سوال کیا کہ آپ کس سے متاثر ہوکر فاسٹ بولر بنے؟ جس پر بولٹ نے جواب دیا کہ بہت سے ایسے بولرز ہیں لیکن سب سے زیادہ وسیم اکرم سے متاثر ہوں۔
فاسٹ بولر کا کہنا تھا کہ ’وسیم اکرم سے میں نے بال کو سوئنگ کرنا سیکھا، ان کی طرح گیند کو کوئی نہیں گھما سکتا، لیجنڈ فاسٹ بولر وسیم اکرم اپنے لیے تعریفی کلمات سننے پر مسکرا دئیے۔
واضح رہے کہ وسیم اکرم نے اپنے کیریئر میں 104 ٹیسٹ میچز میں قومی ٹیم کی نمائندگی کی اور 414 وکٹیں حاصل کی جبکہ 356 ون ڈے میچز میں ان کی وکٹوں کی تعداد 502 ہے۔
دوسری جانب کیوی نمبر ون بولر ٹرینٹ بولٹ نے 67 ٹیسٹ، 90 ون ڈے اور 27 ٹی ٹوینٹی میچز کھیلے ہیں اور بالترتیب 267، 164 اور 39 وکٹیں حاصل کررکھی ہیں۔