لاہور: وزیراعلیٰ پنجاب نے نرسنگ کیڈر کی بہتری کے لیے متعدد اقدامات کی اصولی منظوری دے دی۔
تفصیلات کے مطابق وزیراعلیٰ پنجاب سردار عثمان بزدار کی زیرصدارت اجلاس میں نرسوں کے سروس اسٹرکچر کو اپ گریڈ کرنے کی اصولی منظوری دے دی گئی۔
اجلاس میں نرسوں کی ترقیوں کے امور کو اسٹریم لائن کرنے کا فیصلہ کرنے کے علاوہ نرسنگ کے شعبے میں ایم فل اور پی ایچ ڈی کے لیے اسکالر شپ دینے کی اصولی منظوری دی گئی۔
اس موقع پر وزیراعلیٰ پنجاب کا کہنا تھا کہ نرسنگ اسکولوں کو نرسنگ کالجوں میں اپ گریڈ کیا جائے گا،نرسنگ کالجوں کے ساتھ ہاسٹل بھی بنائے جائیں گے،نرسوں کو اسکالر شپ پر بیرون ملک بھجوائیں گے۔وزیراعلیٰ عثمان بزدار نرسوں کے لیے بڑے پیکیج کاجلد اعلان کریں گے۔
عثمان بزدار نے کڈنی اینڈ لیور ٹرانسپلانٹ انسٹیٹیوٹ کے لیے بزنس پلان جلد تیار کرنے کی ہدایت کرتے ہوئے کہا کہ نرسوں کے لیے آسانیاں پیدا کرنے کے لیے ہرممکن اقدام کریں گے۔
