امریکا میں نشے میں دھت ایک شخص نے نہایت دیدہ دلیری سے والدین کے سامنے ایک 2 سالہ بچے کو اغوا کرنے کی کوشش کی، ماں نے پھرتی دکھا کر ملزم کو پکڑ لیا۔
یہ واقعہ امریکی ریاست کیلی فورنیا کی سان ڈیاگو کاؤنٹی میں پیش آیا جس کی سی سی ٹی وی فوٹیج پولیس نے جاری کردی ہے۔
فوٹیج میں دیکھا جاسکتا ہے کہ گاڑی میں بیٹھی خاتون گاڑی کو ریورس کر رہی ہیں، اسی دوران ایک شخص گاڑی کی طرف بڑھتا ہے اور بغیر کسی خوف کے پچھلا دروازہ کھول کر اندر موجود 2 سالہ بچے کو اٹھانے کی کوشش کرتا ہے۔
دروازہ کھلتے ہی اگلی سیٹ سے ماں بھی اترتی ہے اور مذکورہ شخص کو دھکے دے کر شور کرنے لگتی ہے۔
تھوڑی دیر بعد بچے کا باپ بھی گاڑی سے اترتا ہے اور ملزم کی طرف دوڑتا ہے، عینی شاہدین کے مطابق باپ نے مذکورہ شخص سے ہاتھا پائی بھی کی۔
اس موقع پر ہجوم جمع ہوگیا جنہوں نے بچے کے باپ اور اغوا کار کو ایک دوسرے سے علیحدہ کیا اور پولیس کے آنے تک ملزم کو پکڑے رکھا۔
پولیس نے موقع پر پہنچ کر 37 سالہ شخص کو حراست میں لے لیا، پولیس کا کہنا ہے کہ مذکورہ شخص کسی نشہ آور شے کے زیر اثر لگ رہا تھا، اس پر اقدام اغوا کی دفعات عائد کی گئی ہیں۔
