راولپنڈی: محبوب کے لیے چاند تارے توڑ کر لانے کی باتیں پرانی ہو گئیں، ایک پاکستانی نوجوان نے اپنی بیوی کو چاند پر زمین خرید کر دے دی۔
تفصیلات کے مطابق راولپنڈی سے تعلق رکھنے والے نوجوان صہیب احمد نے اچھوتا کام کر دکھایا، انھوں نے اپنی اہلیہ مدیحہ کو شادی کی پہلی سال گرہ کے تحفے کے طور پر چاند پر ایک ایکڑ زمین خرید کر دے دی۔
صہیب نے اپنی اہلیہ کے لیے چاند پر پلاٹ 45 ڈالر (تقریباً ساڑھے 7 ہزار روپے) میں خریدا ہے، اس جوڑے کے پاس چاند پر زمین کی خریداری کے کاغذات بھی موجود ہیں۔
اے آر وائی نیوز کے پروگرام باخبر سویرا میں گفتگو کرتے ہوئے صہیب نے کہا کہ انھوں نے اپنی بیوی سے چاند تارے توڑ کر لانے کا وعدہ کیا تھا، جسے پھر پورا بھی کرنا تھا، تو اس سلسلے میں انھوں نے انٹرنیٹ پر سرچنگ کی اور پھر ایک ایکڑ زمین چاند پر خرید کر دی۔
صہیب نے بتایا کہ ایک ٹیلی اسکوپ کے ذریعے ان کی پراپرٹی زمین سے بھی دیکھی جا سکتی ہے، چاند پر ان کی زمین کی ایک سیٹلائٹ فوٹو ہے اور اس کے ساتھ کچھ اعداد بھی درج ہیں، تو اگر ایک خاص قسم کی ٹیلی اسکوپ میں وہ اعداد درج کیے جائیں گے اور دیکھنے والے کی بالکنی میں موسم صاف ہے تو اس پلاٹ کی ڈی مارکیشن (حد بندی) دیکھی جا سکتی ہے۔
کیا آپ چاند پر زمین خریدنا چاہتے ہیں؟
مدیحہ صہیب نے بتایا کہ شوہر نے ان کے ساتھ وعدہ کیا تھا اور پھر واقعی میں پلاٹ خرید لیا، زمین پر تو سب ہی تحائف دیتے ہیں لیکن جب مجھے چاند پر زمین تحفے میں دی گئی تو میں بہت خوش ہوئی۔
مدیحہ کا کہنا تھا کہ ان کا فیوچر پلان ہے کہ وہ چاند پر جائیں گے جہاں وہ اپنی جائیداد آنکھوں کے سامنے دیکھیں گی۔
صہیب کا کہنا تھا کہ انھوں نے اپنی بیوی کو پہلے بھی بہت سارے تحائف دے رکھے ہیں، صرف یہی چیز رہ گئی تھی جسے انھوں نے آخرکار پورا کر دیا۔ اس پر ساس نے بھی بہت خوشی کا اظہار کیا۔وہ کہتی ہیں کہ ہر ایک اس بارے میں بات کر رہا ہے کہ صہیب نے مدیحہ کو چاند پر زمین لے کر دی ہے۔
واضح رہے کہ چاند پر ایک ویب سائٹ کے ذریعے 60 لاکھ افراد زمین خرید چکے ہیں، ان میں حال ہی میں بھارت میں خود کشی کرنے والے بہترین اداکار سشانت سنگھ بھی شامل تھے، 44.99 سے لے کر 45 ڈالر تک میں چاند کا ایکڑ فروخت کیا جا رہا ہے۔ یعنی چاند پر ایک ایکڑ پلاٹ تقریباً ساڑھے سات ہزار پاکستانی روپے میں خریدا جا سکتا ہے۔
چاند کی زمین 9 ارب 38 کروڑ 37 لاکھ 48 ہزار 198 ایکڑ پر مشتمل ہے، چاند کی زمین کی کل قیمت 2 کھرب 34 ارب سے زائد بنتی ہے، 1980 میں ڈینس ہوپ نے چاند پر ملکیت کا دعویٰ کیا تھا اور اس سلسلے میں انھوں نے لونر ایمبیسی ویب سائٹ کے ذریعے جائیداد کی خرید و فروخت کا کام شروع کیا تھا۔ ان کے بعد ان کا بیٹا کرس لیمار چاند پر جائیداد کی خرید و فروخت کا کام کر رہا ہے۔
