اسلام آباد: پاکستان میڈیکل ایسوسی ایشن نے ملک میں کرونا کے بڑھتے کیسز کی وجہ ماسک نہ استعمال کرنے کو قرار دے دیا۔
پاکستان میڈیکل ایسوسی ایشن کی جانب سے جاری اعلامیے میں ملک بھر میں کرونا کے کیسز میں اضافے پر تشویش کا اظہار کیا گیا ہے۔
ایسوسی ایشن سے وابستہ ڈاکٹرز کا کہنا تھا کہ ’عام مشاہدہ ہے کہ کرونا کیسز میں اضافے کی وجہ ماسک کا استعمال نہ کرنا ہے‘۔
اعلامیے میں کہا گیا ہے کہ پاکستان میں کرونا کی دوسری لہر شروع ہوگئی ہے، لہذا شہری وائرس سے محفوظ رہنے کے لیے ماسک کا لازمی استعمال کریں۔
نیشنل کمانڈ اینڈ کنٹرول سینٹر کی جانب سے جاری ہونے والے اعداد و شمار کے مطابق پاکستان میں کرونا مریضوں کی تعداد اضافے کے بعد 3 لاکھ 12 ہزار 806 جبکہ مرنے والوں کی تعداد 6 ہزار 484 تک پہنچ گئی ہے۔
مزید پڑھیں: کرونا کے بڑھتے کیسز، کراچی کے مزید علاقوں میں مائیکرو لاک ڈاؤن کا نفاذ
کرونا سے صحت یا ب ہونے والے مریضوں کی تعداد میں اضافہ ہوا، گزشتہ چوبیس گھنٹوں کے دوران 616 مریض وائرس کو شکست دینے میں کامیاب ہوئے جس کے بعد تعداد 2 لاکھ 97 ہزار 497 تک پہنچ گئی۔
پاکستان بھر میں گزشتہ چوبیس گھنٹوں کے دوران 34 ہزار 239 ٹیسٹ کیے گئے جن میں سے 543 کی رپورٹ مثبت آئی، اس وقت 490 مریضوں کی حالت تشویشناک ہے۔
صوبائی سطح پر اعداد و شمار کی بات کی جائے تو سندھ میں 1 لاکھ 37 ہزار 106، خیبرپختونخواہ میں 37 ہزار 811، پنجاب میں 99ہزار 479، اسلام آباد میں 16 ہزار 611، بلوچستان میں 15 ہزار 281، آزاد کشمیر میں 2731 اور گلگت بلتستان میں 3ہزار 787 کیسز رپورٹ ہوچکے ہیں۔
