انقرہ: سعودی صحافی جمال خاشقجی کے قاتلوں سے متعلق ترک عہدے دار کا اہم بیان سامنے آ گیا ہے، ترک صدر کے اطلاعاتی امور کے ڈائریکٹر کا کہنا تھا کہ جمال خاشقجی کے قاتلوں کو ہر کوئی جانتا ہے۔
ترک میڈیا کے مطابق رجب طیب اردوان کے اطلاعاتی امور کے ڈائریکٹر فاحریتین آلتون نے اپنے ٹویٹر اکاؤنٹ کے ذریعے کہا ہے کہ سعودی صحافی جمال خاشقجی کے قاتلوں کو ہر کوئی جانتا ہے۔
انھوں نے کہا واشنگٹن پوسٹ کے رائٹر جمال خاشقجی کو 2 سال قبل سعودی عرب کے استنبول قونصل خانے میں گھات لگا کر قتل کیا گیا تھا، قاتل دستے میں فرانزک ماہر اور اسسٹنٹ شامل تھے، قاتل ٹیم کے ہاتھوں میں آرا مشین بھی تھی۔
فاحریتین آلتون نے یہ بھی کہا کہ جمال خاشقجی کے قاتلوں کو عدلیہ جانے سے روکنے کے لیے اغوا کر لیا گیا تھا، اصل قاتلوں کو بچانے کے لیے عدلیہ کو غلط کیس پیش کیا گیا اور اصلی قاتلوں کو بچا لیا گیا۔
انھوں نے کہا خاشقجی کے قاتلوں کو انصاف کے کٹہرے میں لانے کے لیے ترکی کی پولیس، استغاثہ اور مواصلات کے ماہر دن رات کام کر رہے ہیں تاکہ تمام قاتلوں کو عدلیہ کے روبرو پیش کیا جا سکے، ہم عدلیہ اور انصاف کی فراہمی کے لیے خدمات انجام دے رہے ہیں۔
اطلاعاتی امور کے ڈائریکٹر کا کہنا تھا کہ ہم سب جمال خاشقجی کے قاتلوں کے بارے میں آگاہی رکھتے ہیں اور ان سے احتساب کرنے اور انھیں ترکی کے حوالے کرنے کے مطالبے سمیت سعودی قاتلوں کو بین الاقوامی مبصرین کی موجودگی میں عوام کی کھلی عدالت میں پیش ہونے کا مطالبہ کرتے ہیں۔
