اسلام آباد : وزیر خارجہ شاہ محمود قریشی کا کہنا ہے کہ ترقی پذیر ممالک کیلئے کورونا کے معاشی مضمرات سے نمٹنا مشکل امر ہے ، وزیر اعظم نے کمزور معیشتوں کیلئے قرض کی مد میں چھوٹ کی تجویز دی۔
تفصیلات کے مطابق وزیر خارجہ شاہ محمود قریشی نے کنزرویٹو فرینڈز آف پاکستان کے ورچوئل اجلاس میں بطور مہمان خصوصی شرکت کی۔
اجلاس میں خطاب کرتے ہوئے شاہ محمودقریشی نے کہا کہ برطانیہ میں پاکستانی شہریوں کی موجودگی تعلقات کےاستحکام کا مظہر ہیں، کورونا نے دنیا بھر کی معیشت کو بری طرح متاثرکیا ، ترقی پذیر ممالک کیلئے کورونا کے معاشی مضمرات سے نمٹنا مشکل امر ہے ، وزیر اعظم نے کمزور معیشتوں کیلئے قرض کی مد میں چھوٹ کی تجویز دی۔
وزیر خارجہ کا کہنا تھا کہ پاکستان کورونا کے پھیلاؤ کو کافی حدکم کرنےمیں کامیاب ہوا، وبا کے خلاف پاکستانی نژاد برطانوی شہریوں اور ڈاکٹرزنےخدمات انجام دیں ، وباکیخلاف لڑتے ہوئے جانوں کانذرانہ دینے والوں کوخراج عقیدت پیش کرتے ہیں ، پاکستان نےذمہ دارانہ معاشی پالیسیوں کو اپنایا ہے۔
شاہ محمود قریشی نےمقبوضہ کشمیرمیں انسانی حقوق کی خلاف ورزیوں سے آگاہ کرتے ہوئے کہا بھارت نے یکطرفہ اقدامات سے خطے کے امن کوخطرے سے دوچار کردیا، بھارت مقبوضہ کشمیر کے آبادیاتی تناسب تبدیل کرنے کے درپے ہے۔
انھوں نے مطالبہ کیا کہ مقبوضہ کشمیرمیں انسانی حقوق کی خلاف ورزیوں کوفوری روکاجائے اور عالمی قراردادوں کی روشنی میں مسئلے کے حل کیلئے بھارت پر دباؤ ڈالا جائے۔
