کراچی: پاکستان ڈیموکریٹک موومنٹ (پی ڈی ایم) کراچی کے باغ جناح میں 18 اکتوبر کو جلسہ کرے گی، این او سی کے لیے پیپلز پارٹی کی جانب سے جلد درخواست دی جائے گی۔
تفصیلات کے مطابق پی ڈی ایم کے اٹھارہ اکتوبر کو شیڈول جلسے میں اپوزیشن کے قائدین شریک ہوں گے، جلسے کے لیے پیپلز پارٹی نے موبلائزیشن کمیٹی قائم کر دی، جس میں مرتضیٰ وہاب، عبدالقادر پٹیل اور سعدیہ جاوید کو شامل کیا گیا ہے۔
جے یو آئی نے جلسے کے لیے مولانا عبدالکریم عابد اور اسلم غوری کو نامزد کیا ہے، جلسے کی انتظامی کمیٹی میں ن لیگ اور اے این پی کے نمائندے بھی شامل ہوں گے۔
باغ جناح میں جلسے کی اجازت قومی ورثہ و ادبی تاریخ ڈویژن نےدینی ہے، اس لیے میزبان پی پی نے این او سی کے لیے مزار قائد منیجمنٹ بورڈ کو درخواست نہیں دی۔
اپوزیشن جتنے مرضی جلسے کرے، قانون توڑا تو یہ سب جیل میں ہوں گے، وزیراعظم
پیپلز پارٹی کا کہنا ہے کہ باغ جناح میں جلسے کے لیے درخواست جلد جمع کرا دیں گے۔ دریں اثنا، پیپلز پارٹی کراچی ڈویژن کے رہنما آج باغ جناح کا دورہ کریں گے۔ وزیر اطلاعات و بلدیات سندھ سید ناصر حسین شاہ اور وزیر تعلیم و محنت سعید غنی نے گزشتہ روز مزار قائد سے متصل جناح گراؤنڈ کا دورہ بھی کیا تھا۔
دوسری طرف ن لیگ 12 اکتوبر کو شیر شاہ کراچی میں جلسے کا انعقادکر رہی ہے، ن لیگ کے بارہ اکتوبر والے جلسے سے سابق وزیر اعظم شاہد خاقان عباسی اور احسن اقبال خطاب کریں گے۔
یاد رہے کہ گزشتہ روز اسلام آباد میں ایک سیمینار میں خطاب کے دوران وزیر اعظم عمران خان نے کہا کہ اپوزیشن والے جتنے مرضی جلسے کرلیں اگر قانون توڑا تو سیدھا جیل جائیں گے، انھوں نے کہا یہ لوگ اب وی آئی پی نہیں بلکہ عام قیدیوں والی جیل جائیں گے، اربوں کی چوری کرنے والے کہتے ہیں ہمیں معاف کرو، جس دن ان کو این آر او ملا یہ پاکستان کی تباہی ہوگی۔
