لندن: سابق وزیر اعظم پاکستان میاں نواز شریف کی جانب سے لاک ڈاؤن قوانین کی خلاف ورزی پر لندن پولیس نے تفصیلات مانگ لی ہیں۔
تفصیلات کے مطابق ایک ٹویٹر صارف نے لندن میٹرو پولیٹن پولیس کو متوجہ کیا ہے کہ نواز شریف نے لاک ڈاؤن قوانین کی خلاف ورزی کی ہے۔
ریڈیئنٹ نامی ٹویٹر صارف کی جانب سے میٹرو پولیٹن پولیس کو متوجہ کرنے پر پولیس نے مذکورہ صارف سے اس واقعے کی تفصیلات مانگ لیں۔
ٹویٹر صارف نے نواز شریف کی ہائیڈ پارک میں واک والی ویڈیو کی طرف توجہ دلائی تھی، صارف نے لکھا کہ نواز شریف نے 6 افراد اور ماسک کی پابندی کی خلاف ورزی کی ہے۔
نواز شریف کی وطن واپسی: پاکستان اور برطانیہ کے درمیان اعلیٰ سطح کے رابطے جاری
صارف نے پولیس کو پیغام بھیج کر تفصیلات مہیا کر دیں، جس پر میٹرو پولیٹن پولیس نے صارف کو جواب دیا کہ مقامی پولیس کو اس سلسلے میں آگاہ کر دیا گیا ہے۔
Hello can you please DM us about this so we can discuss the matter further. https://t.co/dinxYKkXmT
— Met Contact Centre (@MetCC) October 12, 2020
واضح رہے کہ یہ معاملہ ایک ایسے وقت میں اٹھایا گیا ہے جب نواز شریف کی وطن واپسی کے لیے پاکستان اور برطانیہ کے درمیان اعلیٰ سطح کے رابطے ہو رہے ہیں، اس سلسلے میں وزیر اعظم عمران خان کے مشیر اور ماہر قانون ڈاکٹر بابر اعوان نے کہا ہے کہ ایکسٹرڈیشن پر متعلقہ حکام سے رابطے جلد منظر عام پر آ جائیں گے۔
دوسری طرف برطانیہ میں کرونا وائرس کی روک تھام کے سلسلے میں نئی حکمت عملی کے تحت پابندیوں کے تین درجات متعارف کرا دیے گئے، جن میں ’میڈیم، ہائی اور ویری ہائی‘ شامل ہیں۔
