راولپنڈی: خانپور اور گرد و نواح کے جنگلات میں آدم خور جانور دیکھ کر مکینوں میں خوف و ہراس پھیل گیا۔
نمائندہ اے آر وائی نیوز کے مطابق خانپور اور گرد و نواح کے جنگلات میں شہریوں نے ببر شیر اور چیتے کو خود دیکھا جس کے بعد وہ بہت زیادہ خوفزدہ ہوگئے ہیں۔
رپورٹ کے مطابق خانپور کے نواحی گاؤں ترناوہ سمیت گرمتھون، خرم پراچہ اور کینتھلہ کے دیہاتوں میں شیر کو دیکھا گیا ہے۔
علاقہ مکینوں نے مطابق شیر نے مویشیوں کا شکار کیا اور اب تک کئی بھیڑ، بکریوں گائے اور بیل کو مار ڈالا ہے۔ علاقہ مکینوں کا کہنا ہے کہ شیر کے حملوں سے مالی نقصان بھی ہورہا ہے جس کی وجہ سے غریب کسان بہت پریشان ہیں۔
مکینوں نے انکشاف کیا کہ خونخوار شیر ترناوہ کے کئی گھروں سے پالتو کتوں کو بھی اٹھا کر لے جاچکا ہے۔ مقامی آبادی نے محکمہ جنگلی حیات سے مطالبہ کیا کہ وہ ببر شیر کو فوری طور پر پکڑیں۔
نمائندہ اے آر وائی نیوز نے بتایا کہ چونکہ اس علاقے میں شیر نہیں پائے جاتے تو امکان ہے کہ یہ کسی کا پالتو شیر ہو جو گھر سے بھاگ کر اب شہریوں کو نقصان پہنچا رہا ہو۔
