ریاض : سعودی حکومت نے مملکت میں مقیم غیر ملکی افراد کو ان کے ویزے سے متعلق تفصیلات اور خروج و عودہ ویزے کی منسوخی کی فیس کے حوالے سے آگاہ کیا ہے۔
تفصیلات کے مطابق سعودی محکمہ پاسپورٹ نے اپنے ایک بیان میں کہا ہے کہ خروج و عودہ ویزے کی منسوخی کے بعد فیس واپس نہیں لی جاسکتی۔
سعودی ذرائع ابلاغ کے مطابق محکمہ پاسپورٹ نے ایک غیرملکی نے استفسار کیا تھا کہ ویزے کی منسوخی کے بعد فیس واپس مل سکتی ہے یا نہیں۔
مقیم غیرملکی کا کہنا تھا کہ اس نے خروج و عودہ ویزا حاصل کیا تھا تاہم دشواری کی وجہ سے سفر کا پروگرام منسوخ کرنا پڑا، آیا اسے خروج وعودہ ویزے کی فیس واپس لینے کا حق ہے یا نہیں۔
محکمہ پاسپورٹ نے ٹوئٹر کے اپنے اکاؤنٹ پر غیر ملکی کے استفسار کا جواب دیتے ہوئے واضح کیا کہ ویزے کے اجرا کے بعد اس میں کوئی ترمیم کی جاسکتی ہے اور نہ ہی خروج وعودہ ویزے کی فیس واپس لی جاسکتی ہے البتہ ابشر کے ذریعے ویزا منسوخ کرایا جاسکتا ہے۔
