کراچی: پاکستانی ڈرامہ انڈسٹری کی معروف اداکارہ سدرہ بتول تین سال بعد شوبز میں واپس آگئی، انہوں نے شادی کے بعد شوبز سے عارضی طور پر کنارہ کشی اختیار کرلی تھی۔
تفصیلات کے مطابق اداکارہ سدرہ بتول نے اے آر وائی ڈیجیٹل کے پروگرام ’گڈ مارننگ پاکستان میں شرکت کی اور شوبز کی میزبان ندا یاسر کے مختلف سوالات کے جواب دئیے، انہوں نے بتایا کہ ان کی شوبز میں واپسی تین سال کے بعد ہورہی ہے۔
سدرہ بتول کا کہنا تھا کہ ان کی دو بیٹیاں ہیں بڑی بیٹی 31 اکتوبر کو تین سال کی ہوئی ہیں اور چھوٹی بیٹی گیارہ ماہ کی ہیں، اداکارہ کا کہنا تھا کہ شادی کے بعد زندگی آسان نہیں لیکن اچھی گزر رہی ہے۔
اداکارہ کا کہنا تھا کہ ان کی شادی 40 دن میں ہوئی تھی، میری نند سے بہت اچھی دوستی تھی، انہوں نے مجھے بہن کے ساتھ ہی دیکھا تھا پھر دونوں فیملیز کی جانب سے رضامندی کے بعد شادی طے ہوئی۔
سدرہ نے شوبز سے دوری کی وجہ بتاتے ہوئے کہا کہ ’وہ خود چاہتی تھیں کہ شادی کے بعد فیملی کو وقت دوں، میری پہلی چوائس ہمیشہ سے فیملی رہی ہے، بہت اچھے پروجیکٹس بھی ملے لیکن فیملی کو ترجیح دی۔
گھریلو زندگی کے حوالے سے اداکارہ کا کہنا تھا کہ گھریلو زندگی میں کافی صبر سے کام لینا پڑتا ہے، اگر آپ خود اچھے رہیں تو سب اچھے ہوتے ہیں۔
انہوں نے کہا کہ ابھی ان کے کافی پروجیکٹس ایسے ہیں جو شادی سے پہلے کے تھے وہ مکمل نہ ہوسکے، سدرہ کا کہنا تھا کہ ایک پروجیکٹ ابھی مکمل کروایا ہے دیگر پراجیکٹ بھی ابھی مکمل کروانے ہیں۔
