کویت سٹی: کویت میں ایک مصری شہری نے 8 ہزار کویتی دینار کوڑے دان میں پھینک دیے۔
تفصیلات کے مطابق کویت میں مقیم ایک مصری تارک وطن نے غلطی سے بڑی رقم کوڑے دان میں پھینک دی، بعد ازاں اسے غلطی کا احساس ہوا لیکن بہت دیر ہو چکی تھی۔
مصری شہری کو جب غلطی کا احساس ہوا تو وہ فوراً کوڑے دان کے مقام پر گیا لیکن اسے وہاں رقم نہیں ملی، معلوم ہوا کہ میونسپل ٹرک نے آکر کوڑا اٹھا لیا تھا۔
مقامی ذرایع ابلاغ کے مطابق یہ واقعہ کویت کے علاقے الجابریہ میں پیش آیا تھا، جس میں ایک مصری تارک وطن کو اپنی غلطی کا بڑا خمیازہ بھگتنا پڑا۔
مصری شہری نے پولیس اسٹیشن جا کر اپنی رپورٹ درج کرائی کہ انھوں نے غلطی سے نقدی سے بھرا تھیلا کوڑے دان میں پھینکا لیکن جائے وقوعے سے میونسپلٹی کا ٹرک کوڑے دان کو خالی کر کے جا چکا تھا، شہری نے پولیس اسٹیشن میں 8 ہزار دینار کے چیک کی کاپی بھی دکھائی جو اس نے ایک بینک سے کیش کیا تھا۔
رپورٹس کے مطابق پولیس نے اس بات کو یقینی بنانے کے لیے کہ مصری شہری سچ بول رہا ہے، واقعے کی تحقیقات کا آغاز کر دیا ہے، پولیس کا کہنا تھا کہ مصری کی رقم تلاش کرنے کے لیے اس کی بھرپور مدد کی جائے گی۔
