لاہور : محکمہ انسداد بدعنوانی کے عملے نے پنجاب میں کامیاب کارروائی کرتے ہوئے ڈاکٹر اور پٹواری سمیت 3 افسران کو رنگے ہاتھوں گرفتار کرکے مقدمہ درج کرلیا۔
تفصیلات کے مطابق اینٹی کرپشن پنجاب نے رشوت خور افسران کے خلاف کریک ڈاؤن کرتے ہوئے ایم بی بی ایس ڈاکٹر، پٹواری سمیت 3سرکاری ملازمین کو حراست میں لے لیا، گرفتارملزمان کیخلاف مقدمات درج کرکے لاک اپ کردیا گیا ہے۔
اس حوالے سے ڈی جی اینٹی کرپشن نے میڈیا کو تفصیلات بتاتے ہوئے کہا کہ میڈیکل افسر ڈاکٹر جعفر کو ڈی ایچ کیو اسپتال ساہیوال سے گرفتار کیا گیا، ڈاکٹر جعفر کو اہلکاروں نے دس ہزارروپے رشوت لیتے ہوئے رنگے ہاتھوں پکڑا تھا۔
ڈی جی اینٹی کرپشن کے مطابق کارروائی میں سرکل افسر سے جوڈیشل مجسٹریٹ نے ملزم سے لی گئی رشوت کی رقم برآمد کرلی، ملزم جعفر کومقدمہ درج کرکے حوالات میں ڈال دیا گیا ہے۔
اس کے علاوہ دیگر کاروائیوں میں اینٹی کرپشن راولپنڈی نے پٹواری مرزا محمد سلیم کو جعلی گفٹ ڈیڈ تیارکرنے پر حراست میں لے لیا جبکہ اینٹی کرپشن ڈی جی خان نے سکندرحیات قانونگو کو40ہزار رشوت لیتے ہوئے رنگے ہاتھوں گرفتار کیا۔
