لاہور : ٹک ٹاک ویڈیو بناتے ہوئے نوجوان کی گولی لگنے سے ہلاکت کا معاملہ نیا رخ اختیار کرگیا ، پولیس نے نامعلوم افراد کے خلاف مقدمہ درج کر لیا۔
تفصیلات کے مطابق لاہور میں ٹک ٹاک بنانے کے دوران مبینہ طور پر گولی چلنے سے نوجوان کی ہلاکت کا معاملہ نیا رخ اختیار کرگیا تھانہ سندر پولیس نے نامعلوم افراد کے خلاف قتل کی دفعات کے تحت مقدمہ درج کر لیا۔
پولیس کے مطابق داؤد کے والد کی مدعیت میں مقدمہ درج کیا گیا، واقعے میں دیسی ساختہ پستول استعمال ہوا، قتل ، خود کشی ، ٹک ٹاک سمیت مختلف پہلوؤں پر تفتیش جاری ہے ۔
پولیس کا کہنا ہے کہ کہ نوجوان داؤد کا موبائل فرانزک لیبارٹری بھجوا دیا گیا ہے ۔گن شوٹ ٹیسٹ اور موبائل فرانزک رپورٹ آنے پر حتمی وجہ معلوم ہوگی۔
مزید پڑھیں : لاہور میں ٹاک ٹاک نے نوجوان کی جان لے لی
یاد رہے لاہور میں ٹک ٹاک ویڈیو بنانے کے دوران فائرنگ سے ایک نوجوان جاں بحق اور دوسرا زخمی ہو گیا تھا ، پولیس کے مطابق واقعہ تھانہ سندر بحریہ میں پیش آیا جہاں نوجوان دوست کے ہمراہ ٹک ٹاک بنانے کے دوران گولی چلنے سے زندگی گنوا بیٹھا۔
پولیس کا کہنا تھا کہ نوجوان اپنے دوست کے ساتھ ٹک ٹاک بنانے میں مصروف تھا کہ اچانک گولی چل گئی جو داؤد کی آنکھ میں لگی اور وہ موقع پر ہی دم توڑ گیا جبکہداؤد کا ساتھی ٹک ٹاکر بھی بازو پر گولی لگنے سے زخمی ہوا۔
دونوں دوست پراپرٹی کے کام سے وابسطہ تھے، دونوں کی عمریں 22سے25 سال کے درمیان ہیں۔ پولیس کا کہنا تھا کہ ابتدائی تحقیقات کے مطابق واقعہ ٹک ٹاک ویڈیو بنانے کے باعث پیش آیا۔
