اسلام آباد: کے سی آر کیس میں سپریم کورٹ کا اہم حکم سامنے آ گیا، سپریم کورٹ نے چیف سیکریٹری سندھ کو شوکاز نوٹس جاری کر دیا۔
اے آر وائی نیوز کے مطابق کراچی سرکلر ریلوے کیس میں سپریم کورٹ نے ٹریک سے تجاوزات کا خاتمہ نہ کرنے پر چیف سیکریٹری سندھ کو شوکاز نوٹس جاری کر دیا ہے۔
سپریم کورٹ نے سیکریٹری ریلوے کو بھی شوکاز نوٹس جاری کر دیا، دونوں افسران کو 2 ہفتے میں تحریری جواب جمع کرانے کا حکم بھی دیا گیا۔
سپریم کورٹ کا کہنا تھا کہ حکم کے باوجود تجاوزات ختم کر کے سرکلر ریلوے پر کام شروع نہیں کیا گیا۔ عدالت کو بتایا گیا کہ خط و کتابت جاری ہے، جس پر جسٹس اعجاز الاحسن نے کہا خط و کتابت سے معاملات کیسے آگے چلیں گے، اس طرح تو 5 سال گزر جائیں گے اور معاملہ چلتا رہےگا۔
سرکلر ریلوے سے متعلق بڑی خبر آ گئی
چیف جسٹس نے کہا تجاوزات نہ ہٹائے جانے پر سیکریٹری ریلوے کو ابھی توہین عدالت کا نوٹس جاری کرتے ہیں، سپریم کورٹ کے احکامات نہیں مانیں گے تو نوٹس جاری کر دیں گے۔
چیف جسٹس نے کہا سندھ حکومت نے عدالتی حکم پر رکاوٹیں نہیں ہٹائیں، سیکریٹری ریلوے نے کہا کہ ہماری طرف سے کچھ بھی کام باقی نہیں ہے، چیف جسٹس نے کہا آپ کو ایک بار بولنے کا موقع دیا تھا، کیا ابھی آپ کو فارغ کر دیں۔
عدالت نے چیف سیکریٹری اور سیکریٹری ریلوے کو آئندہ سماعت پر حاضری یقینی بنانے کا حکم دیا اور کہا ضرورت پڑی تو وزیر اعظم اور وزیر اعلیٰ سندھ کو بھی طلب کریں گے۔ بعد ازاں، سپریم کورٹ نے کراچی سرکلر ریلوے کیس کی سماعت دو ہفتے کے لیے ملتوی کر دی۔
