میڈرڈ : اسپین میں کرونا وائرس کے حملے جاری ہیں، 24 گھنٹوں کے دوران تین ہزار سے زائد کرونا وائرس کے کیسز رپورٹ ہوگئے۔
غیر ملکی خبر رساں ادارے کی رپورٹ کے مطابق یورپی ملک اسپین میں کرونا وائرس کی مہلک ترین وبا نے گزشتہ ہفتے 1082 افراد کی جان لی جبکہ چوبیس گھنٹوں کے دوران تین ہزار تین سو اکیس مزید افراد میں مہلک وائرس کی تصدیق ہوئی ہے۔
کرونا وائرس سے متعلق اعداد و شمار جاری کرنے والے ادارے کا کہنا ہے کہ اسپین میں مجموعی طور پر کرونا کے 1496864 کیسز رپورٹ ہوچکے ہیں جبکہ اب تک کل 41253 افراد کرونا وائرس کے باعث موت کا شکار ہوئے ہیں۔
صوبہ کاتالونیا میں حکومت 23 نومبر سے ایس او پیز میں مرحلہ وار تبدیلی لارہی ہے تاہم صوبائی حکومت نے اعلان کیا ہے کہ کاتالونیا میں رات کا کرفیو بدستور جاری رہے گا۔
حکومت نے ریسٹورنٹس میں 30 فیصد افراد کو اندر اور اتنے ہی باہر بٹھانے کی اجازت دینے کا فیصلہ کیا ہے جکہ صورتحال کے مطابق اس تعداد کو بڑھا کر 50 فیصد کردیا جائے گا۔
