سعودی بحریہ کا زبردست کارنامہ، سمندر سے اسمگلنگ کی کوشش ناکام

ریاض : سعودی عرب میں بڑی مقدار میں اسمگلنگ کی کوشش ناکام بنادی گئی، سعودی بحریہ نے کھلے سمندر میں کامیاب کارروائی کرتے ہوئے لاکھوں ڈالر مالیت کی حشیش برآمد کرلی۔

سعودی بحریہ کی سپیشل فورس 150 نے پیر کو ایک جہاز کو روک کر تلاشی لی جس پر حشیش لدی ہوئی تھی۔ سعودی ذرائع ابلاغ کے مطابق سعودی جنگی جہاز نے سمندر میں جہاز کو روک کر تلاشی لی تو اس سے1579 کلو گرام حشیش برآمد ہوئی۔ اس کی لاگت 80 لاکھ ڈالر ہے۔

اسپیشل فورس کے کمانڈر سلیمان الفقیہ نے بتایا کہ سعود ی بحریہ گہرے سمندر میں اسمگلنگ کی کئی کوششوں کو ناکام بنا چکی ہے اور یہ ان میں سے ایک ہے۔

انہوں نے کہا کہ سمندر میں جہاز کو روک کر تلاشی لینے کا آپریشن فرانسیسی جنگی جہاز کے ذریعے انجام دیا گیا ہے۔ سعودی کمانڈر نے جنگی جہاز کے کمانڈ ر کو آپریشن کی کامیابی پر مبارکباد دی ہے۔

Comments