ریاض : سعودی حکومت نے شہریوں کی سہولت کیلئے سرکاری فیسوں کی ادائیگی کا طریقہ کار آسان کردیا، اس کیلئے آن لائن ادائیگی کے دیگر چینلز بھی متعارف کرائے گئے ہیں۔
تفصیلات کے مطابق سعودی وزارت خزانہ نے سرکاری فیسوں کی ادائیگی کے لیے اضافی چینلز متعارف کرائے ہیں، سداد کے ساتھ بینک کارڈز کے ذریعے بھی سرکاری فیسیں ادا کی جاسکیں گی۔
اس حوالے سے سعودی خبر رساں ادارے کے مطابق سیکریٹری خزانہ برائے آمدن طارق الشعیب نے بتایا کہ سرکاری لین دین میں ڈیجیٹل تبدییلی کے رواج کو فروغ دینے کے لیے سداد کے ساتھ آن لائن ادائیگی کے دیگر چینلز بھی مہیا کردیے گئے ہیں۔
اس سہولت سے شہری اور مقیم غیر ملکی مختلف ویزوں پر مملکت آنے والے اور سرمایہ کار محفوظ طریقے سے بلا کسی رکاوٹ سرکاری فیس ادا کرسکیں گے۔
انہو ں نے کہا کہ مدی اور کریڈٹ کارڈز کے ذریعے سرکاری فیسیں ادا کی جاسکتی ہیں، اکاؤنٹس ہولڈرز مختلف بینکوں کے کارڈز کے ذریعے فیس ادا کرسکتے ہیں۔
بیرون ملک موجود افراد کریڈٹ کارڈ استعمل کرسکتے ہیں، بیرون ملک موجود ایسے صارفین جن کا کسی سعودی بینک میں اکاؤنٹ نہ ہو وہ بھی کریڈٹ کارڈ سے فیس ادا کرسکتے ہیں، نئے فیصلے سے سرکاری خدمات سے حاصل کرنے والوں کو آسانی ہوگی۔
انہو ں نے بتایا کہ ادائیگی کے اضافی چینلز مؤثر کردیے گئے ہیں، مستقبل قریب میں باقی ماندہ اداروں کو بھی اس سسٹم میں شامل کر لیا جائے گا۔
