کابل : وزیراعظم عمران خان نے کہا پاکستان کی حکومت اور عوام افغانستان میں امن کے خواہاں ہیں ، افغانستان میں امن کیلئے ہر ممکن تعاون کریں گے۔
تفصیلات کے مطابق وزیراعظم عمران خان نے افغان صدارتی محل میں افغان صدر کے ساتھ مشترکہ نیوز کانفرنس میں کہا کہ دورہ افغانستان کی دعوت دینے پر مشکور ہوں، پہلی بار کابل کا دورہ کرنے کاموقع ملا ، کابل تاریخی شہر ہے جو ہم سب کیلئے اہمیت کا حامل ہے۔
وزیراعظم کا کہنا تھا کہ پاکستان اور افغانستان کےدرمیان تاریخی تعلقات ہیں اور پاکستان کی حکومت اور عوام افغانستان میں امن کے خواہاں ہیں، افغانستان میں امن خطے میں امن کی ضمانت ہیں۔
عمران خان نے کہا کہ افغان امن مذاکرات کے باوجود افغانستان میں پرتشددواقعات پرتشویش ہے اور افغان حکومت اور طالبان کے درمیان جنگ بندی چاہتے ہیں۔
ان کا کہنا تھا کہ مفاہمتی عمل میں پاکستان نے اپنا مثبت کردارادا کیا ہے ، افغانستان کے بعد سب سے زیادہ امن کی خواہش پاکستان کی ہے، افغان جنگ سے پاکستان کےقبائلی علاقوں کوسب سے زیادہ نقصان اٹھانا پڑا۔
وزیراعظم نے مزید کہا کہ دونوں ممالک کے درمیان معاشی ترقی کیلئے رابطے کو بڑھائیں گے، مشیر تجارت نے 3دنوں میں افغان حکام اہم ملاقاتیں کی ہیں، افغانستان میں امن کیلئے ہر ممکن تعاون کی یقین دہانی کراتے ہیں۔
عمران خان نے یقین دلایا کہ افغانستان میں تشددکے خاتمے کیلئے اپنا بھرپور کردار ادا کریں گے، افغانستان میں امن ہمارے اپنے مفاد میں ہے۔
