ماسکو: روس میں ایک خوش قسمت شہری کو نئی زندگی مل گئی، بلندوبالا عمارت سے گرنے والے دو ٹن وزنی بلاک نے گاڑی تباہ کردی لیکن مالک معجزانہ طور پر بچ گیا۔
غیرملکی خبررساں ادارے کی رپورٹ کے مطابق یہ دہشت ناک حادثہ روس کے شہر ولیدیو اسٹوک میں پیش آیا۔ 27 سالہ الیکس زینڈر نامی شخص عمارت کے نیچے کھڑی اپنی گاڑی سے برف کی تہہ ہٹا رہا تھا کہ اس دوران 2 ٹن وزنی سلیب بلندی سے نیچے آگری، خوش قسمتی سے شہری کی جان بچ گئی۔
رپورٹ کے مطابق ایک بچے کا باپ الیکس زینڈر اگر حادثے سے چند لمحوں قبل اوپر نہ دیکھتا تو شاید وہ بھی اس ہولناکی کی زد میں آجاتا، مذکورہ شخص نے فوراً بھاگ کر اپنی جان بچائی۔
8 فٹ لمبی اور 2 ٹن وزنی سلیب تقریباً 100 فٹ بلندی سے نیچے آئی، بلاک نے گاڑی کو شدید نقصان پہنچایا لیکن معجزانہ طور پر شہری کو نئی زندگی ملی جس کی اس نے خود بھی خوشی منائی۔
شہری نے اپنی متاثرہ گاڑی کے ساتھ تصاویر بھی بنوائی اور کہا میں خوش قسمت انسان ہوں۔ حادثے سے کچھ دیر قبل ان کی بیوی بھی جائے وقع پر موجود تھیں، وہ بھی محفوظ رہیں۔
