باجوڑ: سیکیورٹی فورسز کی جانب سے ملک بھر میں دہشت گردوں کا قلع وقمع کرنے کے لئے آپریشن جاری ہے، اسی طرح کے آپریشن میں باجوڑ میں کالعدم تنظیم داعش کا دو اہم کمانڈر مارے گئے ہیں۔
اے آر وائی نیوز کے مطابق سیکیورٹی فورسز نے خفیہ اطلاعات پر باجوڑ میں کارروائی کی، کارروائی کے دوران دہشت گردوں اور سیکیورٹی فورسز کے درمیاب فائرنگ کا تبادلہ ہوا، دو طرفہ فائرنگ کے نتیجے میں کالعدم داعش کے دو اہم کمانڈر مارے گئے ، ہلاک ہونے والوں دہشت گردوں میں دہشت گرد کمانڈر زبیر اور عزیز الرحمان ہیں۔
سیکیورٹی ذرائع کے مطابق ہلاک دہشت گرد عزیز الرحمان کالعدم داعش کراچی کا سربراہ تھا۔
گذشتہ روز سندھ رینجرز اور پولیس نے انٹیلی جنس بنیاد پر کراچی کے علاقے گلشن معمار میں مشترکہ کارروائی کی، اس دوران کالعدم تحریک طالبان کے 3دہشت گرد گرفتار ہوئے۔
ترجمان رینجرز کا کہنا ہے کہ گرفتار دہشت گردوں میں یاسین، اکرام اللہ عرف فیصل اور محمدخالد عرف عمر شامل ہے جو شہر میں اپنے ناپاک عزائم رکھتے تھے۔
رینجرز نے بتایا کہ ان میں سے دو دہشت گرد حال ہی میں افغانستان سے آئے تھے، دنوں دہشت گرد کراچی میں کارروائی کرنا چاہتے تھے، ملزمان کا تعلق کالعدم ٹی ٹی پی کمانڈر سعد بلال عرف ہمایوں گروپ سے ہے۔
یاد رہے کہ رواں ماہ 13 نومبر کو سی ٹی ڈی نے کالعدم سپاہ محمد پاکستان کے انتہائی خطرناک تربیت یافتہ 2 دہشت گردوں کو گرفتار کیا تھا، ملزمان نے 2011 سے 2014 تک مذہبی ٹارگٹ کلنگ کا انکشاف کیا۔
