کراچی: شہر کراچی کے علاقے لیاری سے تعلق رکھنے والے باکسر نادر بلوچ ڈبلیو بی سی مڈل ایسٹ ٹائٹل جیتنے والے پہلے پاکستانی بن گئے، ان کا عزم ہے کہ وہ پاکستان کے لیے مزید ٹائٹلز حاصل کریں۔
تفصیلات کے مطابق باکسر نادر بلوچ نے ڈبلیو بی سی مڈل ایسٹ کا ٹائٹل اپنے نام کرلیا، یہ ان مسلسل چھٹی فائٹ ہے جس میں انہوں نے فتح حاصل کی ہے۔
اے آر وائی نیوز کے مارننگ شو باخبر سویرا میں گفتگو کرتے ہوئے انہوں نے بتایا کہ انہوں نے افغان کھلاڑی حسن کو شکست دے کر ٹائٹل اپنے نام کیا۔
نادر نے بتایا کہ وہ صرف اپنے جنون کے بل بوتے پر یہاں تک پہنچے ہیں، نہ ان کی باکسرز جیسی مخصوص ڈائٹ ہے اور نہ وسائل۔ اس کے باوجود وہ پاکستان کے لیے مزید ٹائٹلز حاصل کرنے کے خواہشمند ہیں۔
ان کے مطابق وہ باکسنگ کے لیے سپلیمنٹس یا نیوٹریشن لینے کی استطاعت نہیں رکھتے۔
نادر کا کہنا ہے کہ وہ لیاری میں باکسنگ کرنے والی بچیوں سے بھی ملتے رہتے ہیں اور ان کا حوصلہ بڑھاتے ہیں، ان کی خواہش ہے کہ وہ ان کی بھی ٹریننگ کریں اور انہیں آگے بڑھائیں۔
انہوں نے شکوہ کیا کہ لیاری کے علاقے کو سیاسی طور پر بدنام کیا جاتا ہے، یہاں موجود کھیل کے پوٹینشل کے لیے کچھ نہیں کیا جاتا، ان کے مطابق اگر وہ ایسے نامساعد حالات کے باوجود پاکستان کا نام روشن کرسکتے ہیں تو ذرا سی توجہ سے لیاری کا ہر نوجوان یہ کام کرسکتا ہے۔
