کوئٹہ : سینیٹ الیکشن کے قریب آتے ہی وفاق کی اتحادی جماعتوں کے ناراض ہونے کا سلسلہ شروع ہوگیا ہے، ایم کیو ایم کے بعد بی اے پی بھی تحریک انصاف سے ناراض ہوگئی ہے۔
تفصیلات کے مطابق کوئٹہ میں بلوچستان عوامی پارٹی کے صدر کی زیرصدارت پارلیمانی اراکین کا اجلاس ہوا، اجلاس میں وفاقی حکومت کا اتحادی جماعتوں کے ساتھ رویہ زیر بحث رہا۔
بی اے پی کے پارلیمانی اراکین نے اتحادی جماعت پی ٹی آئی سے اظہار ناراضی کرتے ہوئے کہا کہ پی ٹی آئی وفاقی اور کے پی کے کابینہ میں ہمیں مسلسل نظر انداز کررہی ہے،اس کے برعکس بی اے پی اراکین پی ٹی آئی کو قومی اسمبلی سینیٹ اور کے پی میں سپورٹ کررہی ہے۔
پارلیمانی اراکین کا شکوہ تھا کہ تحریک انصاف نے بی اے پی کو وفاقی کابینہ اور کے پی میں نمائندگی نہیں دی اور وفاق میں جو محکمہ بلوچستان عوامی پارٹی کو دیا گیا اس سے عوامی مسائل حل نہیں ہوتے، پارلیمانی اراکین کا مطالبہ تھا کہ جس طرح ایوانوں میں ہم وفاقی حکومت کو سپورٹ کررہے ہیں پی ٹی آئی اسی طرح ہمیں نمائندگی بھی دے۔
اس سے قبل ایم کیو ایم نے بھی وفاق کے ساتھ مردم شماری کے نتائج جاری کرنے پر تحفظات کا اظہار کیا تھا، ایم کیو ایم پاکستان نے گذشتہ ہونے والے اپنے اجلاس میں حکومت سے مطالبہ کیا تھا کہ دو ہزار اٹھارہ کی مردم شماری میں کراچی کی آبادی کو کم گنا کیا، وفاق کراچی میں مردم شماری سے متعلق واضح فیصلہ کرے۔
