اسلام آباد: وزیر اعظم عمران خان نے دہشت گردوں کے حملے میں 7 بہادر سپاہیوں کی شہادت پر اظہار افسوس کرتے ہوئے کہا ہے کہ ہمارے سپاہیوں کو بھارتی حمایت یافتہ دہشت گردوں کے حملے کا سامنا ہے۔
تفصیلات کے مطابق گزشتہ رات بلوچستان کے علاقے ہرنائی میں ایف سی پوسٹ پر حملے میں 7 اہل کاروں کی شہادت کے واقعے پر وزیر اعظم نے ٹویٹ کرتے ہوئے کہا ہے کہ میں شہدا کو خراج عقیدت اور لواحقین سے دلی تعزیت کرتا ہوں۔
وزیر اعظم عمران خان نے کہا ہمارے بہادر سپاہیوں کو بھارتی حمایت یافتہ دہشت گردوں کے حملے کا سامنا کرنا پڑتا ہے، ہماری قوم اپنے بہادر سپاہیوں کے ساتھ کھڑی ہے۔
Saddened to hear of 7 brave soldiers martyrdom as a result of terrorist attack on FC post in Harnai Balochistan late last night. My heartfelt condolences & prayers go to their families. Our nation stands with our courageous soldiers who face attacks from Indian backed terrorists.
— Imran Khan (@ImranKhanPTI) December 27, 2020
ادھر وزیر خارجہ شاہ محمود قریشی نے بھی اپنے بیان میں کہا ہے کہ پاکستان کو نقصان پہنچانے کے لیے بھارت کی طویل منصوبہ بندی سامنے آ چکی ہے، تاہم پاکستان کی افواج دشمن کا مقابلہ کرنے کے لیے بالکل تیار ہے۔
دہشت گردوں کا بزدلانہ وار، ایف سی کے 7 اہلکار شہید، آئی ایس پی آر
وزیر خارجہ کا کہنا تھا دہشت گردی کو شکست دینے میں پاکستان کو کامیابی ملی ہے، بھارت کی ملک کو غیر مستحکم کرنے کی سازشوں کے خلاف قوم کو متحد ہونا ہے۔
واضح رہے کہ گزشتہ رات دہشت گردوں نے بلوچستان کے علاقے ہرنائی میں ایف سی پوسٹ پر فائرنگ کی تھی، ڈی جی آئی ایس پی آر کے مطابق گزشتہ رات کے واقعے میں شدید فائرنگ سے 7 اہل کار شہید ہو گئے تھے۔
آئی ایس پی آر کا کہنا ہے کہ حملہ کرنے والے فرار ہو گئے تھے جنھیں پکڑنے کے لیے علاقے کا محاصرہ کیا گیا اور سرچ اینڈ کلیئرنس آپریشن کیا گیا، ڈی جی نے کہا کہ دہشت گردوں کی ایسی بزدلانہ کارروائیاں امن کو سبوتاژ نہیں کر سکتیں، سیکورٹی فورسز دشمن کی ہر سازش کو ناکام بنا دیں گی۔
