کراچی: شوبز انڈسٹری کی معروف اداکارہ رمشا خان نے اداکار علی عباس سے اپنے رشتے کی وضاحت کردی۔
تفصیلات کے مطابق اداکارہ رمشا خان نے اے آر وائی ڈیجیٹل کے پروگرام ’گڈ مارننگ پاکستان‘ میں شرکت کی اور میزبان ندا یاسر کے مختلف سوالات کے جواب دئیے ، واضح رہے کہ ڈرامہ سیریل ’گھسی پٹی محبت ‘ میں رمشا خان مرکزی کردار ادا کررہی ہیں ، ڈرامے کی دیگر کاسٹ میں شہود علوی، وہاج علی ، علی عباس ، صبا حمید ، ثنا عسکری، ثمینہ احمد ودیگر شامل ہیں۔
رمشا خان نے بتایا کہ ڈرامے میں وہاج علی اور شہود علی ، علی عباس کے ساتھ کام کرنے کا تجربہ اچھا رہا، اداکارہ نے بتایا کہ علی عباس کو علی بھائی اس لیے کہتی ہیں کیونکہ وہ ان کے کزن ہیں۔
شوکی میزبان ندا یاسر نے سوال کیا کہ وہ کیسے کزن ہیں؟ جس کا جواب دیتے ہوئے اداکارہ نے کہا کہ علی عباس میرے فرسٹ کزن ہیں اور وہ میری سگی خالہ کے بیٹے ہیں۔
اداکارہ کا کہنا تھا کہ بچپن میں مجھ سمیت سب بچے علی عباس سے بہت ڈرتے تھے، وہ مجھے اور میری چھوٹی بہن کو بہت ڈراتے تھے اور کہتے تھے کہ یہاں پر بھوت ہے، اس وقت ان کے ذہن میں یہ ہوتا تھا کہ کراچی سے آئے ہیں آؤ ذرا ان کو ڈراتے ہیں۔
رمشا خان نے بتایا کہ جب ڈرامے کے سیٹ پر علی عباس سے سامنا ہوا تو اندازہ ہوا کہ وہ بہت ہی خوش مزاج شخص ہیں لیکن وہاج علی کے ساتھ یہ میرا دوسرا ڈرامہ ہے وہ اور میں بہت اچھے دوست بھی ہیں جبکہ سیٹ پر شہود بھائی خوب ہنساتے تھے ڈرامے میں شوٹنگ ہم نے ہنستے کھیلتے ہوئے مکمل کی۔
واضح رہے کہ ڈرامہ سیریل ’گھسی پٹی محبت‘ میں رمشا خان (سامعہ ) نامی لڑکی کا کردار ادا کررہی ہیں جن کی دو شادیاں ناکام ہوچکی ہیں اور تیسری شادی شارق (علی عباس) سے انجام پائی ہے، کیا سامعہ کی شارق سے تیسری شادی کامیاب ہوگی؟ ڈرامے میں نیا کیا ہونے جارہا ہے؟ یہ جاننے کے لیے ڈرامہ سیریل ’گھسی پٹی محبت‘ اے آر وائی ڈیجیٹل پر ہر جمعرات کی رات 8 بجے دیکھنا نہ بھولیں۔
