اسلام آباد: وفاقی دارالحکومت اسلام آباد میں ناکے ختم ہونے کے بعد ڈاکو بے لگام ہوگئے ہیں، ڈاکوؤں کی فائرنگ کے باعث دو ٹرک ڈرائیور جاں بحق ہوگئے ہیں۔
وزیر داخلہ شیخ رشید کے منصب سنبھالتے ہی بڑا اعلان کیا گیا کہ وفاقی دارالحکومت میں حساس مقامات کے علاوہ تمام ناکے ختم کئے جائیں، وزیر داخلہ کے اعلان پر عملدرآمد کیا گیا اور اسلام آباد میں متعدد مقامات سے ناکے ختم کئے گئے تاہم ناکے ختم ہونے کے بعد چوری اور ڈکیتی کی وارداتوں میں اضافہ ہوگیا ہے۔
آج علی الصبح اسلام آباد کے تھانہ شمس کالونی آئی جے پی روڈ پر موٹر سائیکل پر سوار ڈاکوؤں نے دو ٹرکوں کو لوٹنے کی کوشش کی، ٹرک ڈرائیوز نے موٹر سائیکل سواروں کے ارادوں کو بھانپ لیا اور ٹرکوں کو نہ روکا، جس پر ڈاکوؤں نے فائرنگ کردی، فائرنگ کے نتیجے میں دو ڈرائیو جاں بحق ہوگئے جبکہ ڈاکو فائرنگ کے بعد با آسانی فرار ہوگئے۔
واقعے کی اطلاع ملنے پر اسلام آباد پولیس موقع پر پہنچی اور ملزمان کی موٹر سائیکل کو اپنی تحویل میں لیتے ہوئے کارروائی کا آغاز کردیا ہے، پولیس نے واردات کی سی سی ٹی وی فوٹیج بھی حاصل کرلی ہے۔
گذشتہ روز بھی اسلام آباد کے علاقے میلوڈی مارکیٹ کی جیولری شاپ میں ڈکیتی کی کوشش کی گئی تھی، گارڈ اور مالک کی مزاحمت پر ڈاکوؤں کی فائرنگ سے ایک شخص شدید زخمی ہوا تھا، بھکاری کے روپ میں آنے والے ڈاکو ساتھیوں کے ہمراہ گاڑی میں باآسانی فرار ہو گئے تھے۔
