کراچی: وزیراعلیٰ سندھ مراد علی شاہ نے بے گھر افراد کو عارضی پناہ گاہیں فراہم کرنے کی ہدایت کردی۔
اے آر وائی نیوز کی رپورٹ کے مطابق وزیراعلیٰ سندھ مراد علی شاہ نے سخت سردی کے پیش نظر صوبے بھرمیں بے گھر افراد کو عارضی پناہ گاہیں فراہم کرنے کی ہدایت کردی، مراد علی شاہ کا کہنا ہے کہ کوئی بھی شخص گلیوں، سڑکوں ، فٹ پاتھوں پر سردی سے پریشان نہ ہو۔
اس سلسلے میں حیدرآباد، لاڑکانہ، سکھر، شہید بینظیر آباد، میرپورخاص کے ڈپٹی کمشنر کو مراسلہ جاری کردیا گیا۔
مراسلے میں کہا گیا ہے کہ عارضی پناہ گاہوں کے انتظام تک بے گھر افراد کو کمبل پہنچائے جائیں، تمام ڈپٹی کمشنرز بے گھر افراد کو ضروری اشیا اپنی نگرانی میں فراہم کریں۔
سندھ حکومت کی جانب سے جاری کردہ مراسلے میں کہا گیا ہے کہ ہر گزرتے دن کے ساتھ سردی میں اضافہ ہورہا ہے، سخت سردی کے باعث بے گھر افراد مشکلات کا شکار ہیں۔
واضح رہے کہ کراچی میں سردی کی لہر برقرار ہے، آج کم سے کم درجہ حرارت 9 ڈگری سینٹی گریڈ ریکارڈ کیا گیا، محکمہ موسمیات کا کہناتھا کہ گزشتہ شب سرد ترین رات تھی اور آئندہ دو سے تین روز سردی کی لہر اسی طرح برقرار رہے گی۔
