ممبئی : آسٹریلیا کے دورے پر موجود بھارتی ٹیم کو ایک اور دھچکا لگ گیا، فاسٹ بولر محمد شامی اور امیش یادیو کے بعد کے ایل راہول بھی زخمی ہوکر سیریز سے باہر ہوگئے۔
تفصیلات کے مطابق بھارتی کرکٹ ٹیم ان دنوں سیریز کھیلنے کیلئے آسٹریلیا کے دورے پر ہے، اس اہم موقع پر اسے تیسرے اہم کھلاڑی نے بھی چھوڑ دیا، محمد سمیع اور اُمیش یادو کے بعد کے ایل راہل بھی زخمی ہوکر باہر بیٹھ گئے۔
بھارتی کرکٹ ٹیم کے بلے باز لوکیش راہول کلائی میں چوٹ لگنے کی وجہ سے آسٹریلیا کے خلاف سیریز کے باقی دو ٹیسٹ میچز سے باہر ہوگئے ہیں۔
اس حوالے سے بی سی سی آئی ذرائع کا کہنا ہے کہ میلبورن میں پریکٹس سیشن کے دوران کے ایل راہل کو چوٹ لگ گئی، لوکیش راہل پہلے دو ٹیسٹ میں نہیں کھیلے تھے اور اب انجری کی وجہ سے وہ بقیہ دو میچ بھی نہیں کھیل پائیں گے۔
بی سی سی آئی کی جانب سے جاری کردہ بیان کے مطابق راہل کو نیٹ پر بیٹنگ کرتے وقت کلائی میں چوٹ آئی اور انہیں صحت یاب ہونے میں کم از کم تین ہفتوں کا وقت درکار ہوگا۔
یاد رہے کہ کے ایل راہول سے پہلے فاسٹ بالر محمد سمیع اور اُمیش یادو بھی انجری کے سبب سیریز سے باہر ہوچکے ہیں۔ محمد سمیع کو پہلے ٹیسٹ میچ کے دوران چوٹ لگی تھی جبکہ دوسرے ٹیسٹ میں امیش زخمی ہوگئے تھے۔ یہ تینوں کھلاڑی وطن واپس آئیں گے اور بنگلور میں نیشنل کرکٹ اکیڈمی میں رہیں گے۔
