استاد عبدالقادر پیا رنگ 8 جنوری 1979ء کو وفات پاگئے تھے۔ پاکستان کے ممتاز موسیقار اور اس فن میں استاد کا درجہ رکھنے والے عبدالقادر پیا رنگ کو اس لیے بھی اہمیت دی جاتی ہے کہ اس فن میں انھوں نے فقط اپنے شوق اور لگن سے کمال حاصل کیا تھا اور ان کا کسی موسیقی کے گھرانے سے تعلق نہ تھا۔
استاد عبدالقادر پیارنگ 1906ء میں پنجاب کے ضلع فیروز پور کے ایک گائوں میں پیدا ہوئے تھے۔ اپنے خاندان اور سرپرستوں کی موت کے بعد ان کی زندگی بڑی کس مپرسی میں بسر ہوئی۔
عبدالقادر پیا رنگ نے شہروں شہروں خاک چھانی اور گزر بسر بہت دشوار رہی۔ اسی زمانے میں مدراس میں استاد حافظ ولایت علی خان کی شاگردی اختیار کی اور موسیقی کے اسرار و رموز سیکھنے لگے۔ بعد میں بمبئی چلے گئے جہاں آل انڈیا ریڈیو اور پھر فلم کی موسیقی دینے کا موقع ملا۔ یوں ان کے فن اور صلاحیتوں کے اظہار کا آغاز ہوا۔
قیامِ پاکستان کے بعد وہ یہاں چلے آئے۔ حیدرآباد اور بعد میں کراچی میں اقامت پذیر ہوئے جہاں دینا لیلیٰ اور رونا لیلیٰ کو موسیقی کی تربیت دی۔ 1965ء میں کراچی سے راولپنڈی منتقل ہوگئے جہاں اپنے میوزک اسکول کی بنیاد رکھی اور اس کے فروغ اور تربیت کا سلسلہ شروع کیا۔
اپنے وقت کے نام ور موسیقار، گلوکار اور اس سے وابستہ فن کار ان کے قدر دانوں میں شامل رہے۔ وہ راولپنڈی میں موفون ہیں۔
