ڈیرہ بسی: بھارتی پنجاب میں ایک شخص کو گاڑی میں چابی چھوڑ کر جانا اس وقت مہنگا پڑ گیا جب چور گاڑی میں داخل ہو کر اسے لے اڑے، پریشانی کی بات یہ تھی کہ کار میں اس کی بیوی بھی موجود تھی۔
تفصیلات کے مطابق بھارتی پنجاب میں 2 ڈاکو کار لے کر بھاگے جب کہ کار مالک کی اہلیہ بھی گاڑی میں موجود تھی، یہ واقعہ پنجاب کے شہر ڈیرہ بسی میں پیش آیا، جہاں میاں بیوی اپنے بچوں کی اسکول فیس بھرنے آئے تھے۔
رپورٹ کے مطابق راجیو چند نامی شہری سکھمنی اسکول میں بچوں کی فیس کے لیے گیا تو چابیاں گاڑی کے اندر ہی چھوڑ دیں، کیوں کہ ان کی بیوی بھی اس وقت کار کے اندر بیٹھی ہوئی تھی۔
گاڑی کا مالک جیسے اسکول چلا گیا، دو ڈاکو کار میں اندر داخل ہو گئے، ایک ڈرائیور سیٹ پر بیٹھ گیا اور دوسرے نے پیچھے بیٹھ کر خاتون کا منہ ہاتھوں سے مضبوطی سے بند کر دیا، تاکہ وہ چیخ کر لوگوں کو متوجہ نہ کر سکے۔
رپورٹ کے مطابق ڈاکوؤں نے پانچ کلو میٹر تک گاڑی ڈرائیو کی اور اس کے بعد خاتون کو گاڑی سے اتار کر گاڑی لے گئے۔
پولیس کا کہنا ہے کہ گاڑی کی تلاش شروع کر دی گئی ہے، علاقے میں موجود سی سی ٹی وی چیک کیے جا رہے ہیں، جلد ملزمان کو پکڑ لیا جائے گا۔
