روس میں چند نوعمر لڑکوں کی شرارت خوفناک حادثے کا سبب بن گئی، 11 سالہ لڑکا ٹرین کی پٹری پر گر گیا اور ٹرین اس کے اوپر سے اس کی ٹانگوں کو کاٹتی ہوئی چلی گئی۔
مقامی میڈیا کے مطابق 11 سالہ آرکدے اکسنوو کے ساتھ پیش آنے والے اس خوفناک حادثے نے سب کو دہلا کر رکھ دیا ہے۔
مقامی میڈیا رپورٹ کے مطابق نوعمر لڑکا یوٹیوب کے لیے ایک اسٹنٹ کے دوران ریل کی پٹری پر گر پڑا، اس اسٹنٹ کو ٹرین سرفنگ کہتے ہیں اور اس میں اسٹنٹ کرنے والا نوجوان چلتی ٹرین سے باہر فضا میں جھولتا دکھائی دیتا ہے۔
متعدد افراد اس اسٹنٹ کی خطرناکی کو سمجھے بغیر اسے کرتے ہیں اور موت کا شکار ہوجاتے ہیں۔
مذکورہ لڑکا بھی اسی اسٹنٹ کو کرتے ہوئے پٹری پر گر گیا اور ریل گاڑی اس کے اوپر سے گزرتی چلی گئی، حادثے میں لڑکے کی ایک ٹانگ کٹ کر الگ ہوگئی جبکہ دوسری بھی شدید زخمی ہے۔
لڑکا منفی 5 ڈگری سینٹی گریڈ میں اپنے خون میں لتھڑا شدید زخمی حالت میں تقریباً 1 گھنٹے تک پٹری پر پڑا رہا یہاں تک دوسری ٹرین گزری تو اس کے ڈرائیور نے خلاف اصول ٹرین روک کر لڑکے کو طبی امداد دی اور ایمرجنسی سروس کو کال کی۔
لڑکے کی والدہ کا کہنا ہے کہ ان کے بیٹے کے ساتھ 12 اور 14 سال کے 2 اور لڑکے بھی موجود تھے، انہی لڑکوں نے ان کے بیٹے کو ہراساں کیا اور اسے یہ خطرناک اسٹنٹ کرنے پر اکسایا۔
والدہ کا کہنا ہے کہ حادثے کے بعد وہ اسے خون میں تربتر چھوڑ کر نہایت آرام سے بغیر کسی خوف کے چلتے بنے، وہ چاہتے تو لوگوں کو متوجہ کرسکتے تھے اور ایسا کرنے پر وہ ہیرو بن جاتے۔
سماجی رابطے کی ویب سائٹ فیس بک پر اپنی طویل پوسٹ میں والدہ نے ان لڑکوں کو مخاطب کرتے ہوئے لکھا کہ قانون کی رو سے تمہیں کوئی سزا نہیں مل سکتی کیونکہ تم کم عمر ہو۔
انہوں نے لڑکوں کے والدین کو بھی مخاطب کیا اور کہا کہ یہ تمہاری سزا ہے کہ ہر رات تمہیں اپنے خوابوں میں خون میں لتھڑا ایک جسم دکھائی دے گا جو اپنے بازو پھیلا کر تمہاری طرف بڑھ رہا ہوگا۔
لڑکے کو بچانے والے ٹرین ڈرائیور کا کہنا ہے کہ جب انہوں نے اسے دیکھا کہ تو پہلے وہ اسے برف سمجھے جو سیاہ رنگ کی دکھائی دے رہی تھی، غور کرنے پر اندازہ ہوا کہ وہ کوئی انسان تھا۔
ڈرائیور کے مطابق لڑکا منجمد کردینے والی سردی میں اوندھا پڑا تھا اور اس کا چہرہ اپنے خون کے تالاب میں ڈوبا ہوا تھا۔
اس نے کہا کہ بچے اس بات کو نہیں سمجھتے کہ اگر کوئی ٹرین آہستگی سے بھی گزر رہی ہوگی تو اس کی قوت انہیں ٹرین کے نیچے کھینچ سکتی ہے۔
دوسری جانب لڑکا 2 ہفتوں سے وینٹی لیٹر پر ہے اور اس کی حالت تشویش ناک ہے، والدہ کا کہنا ہے کہ وہ مشہور ہونے کے لیے نوجوانوں میں ایسے خطرناک اسٹنٹس کے رجحان کے خلاف آگاہی پھیلانا چاہتی ہیں۔
