میرٹھ : بھارت میں موبائل فون خریدنے کیلئے پیسے نہ دینے پر نوجوان نے اپنی سوتیلی ماں کا گلا دبا کر قتل کردیا۔ پولیس نے ملزم کو گرفتار کرکے نعش پوسٹ مارٹم کیلئے اسپتال منتقل کردی۔
تفصیلات کے مطابق بھارتی شہر میرٹھ کے سردھنہ تھانے کی حدود میں موبائل فون کے تنازعہ نے بیٹے نے اپنی ماں کی جان لے لی۔
خیجر نامی 18سالہ لڑکے نے اپنی سوتیلی ماں سے موبائل فون خریدنے کے لئے دس ہزار روپے کا مطالبہ کیا تھا لیکن ماں کے انکار کرنے پر اس نے اپنی سوتیلی ماں35سالہ ریشماں کے دوپٹے سے ہی اس کا گلا دبا کر قتل کر دیا۔
بھارتی میڈیا کے مطابق خونی واردات کے بعد ملزم نے خود ہی اپنے والد کو اس کی اطلاع دی۔ بعد ازاں پولیس نے ملزم کو گرفتار کرکے تھانے لے آئی جہاں اس نے اپنا جرم قبول کرلیا۔
قاتل بیٹے کو پولیس نے گرفتار کرکے جیل بھیج دیا جبکہ مزید کارروائی کیلئے نعش کو پوسٹ مارٹم کیلئے اسپتال منتقل کردیا ہے۔ موبائل کے لئے ماں کا قتل کردینے کی اس واردات پر علاقے میں شدیدی غم و غصہ پایا جارہا ہے۔
