لندن: برطانیہ میں کوروناوائرس کے باعث موت سے قبل مریضہ کی جانب سے اپنے بیٹے اور شوہر کے لیے آخری دل خراش جملے نے سب کو آب دیدہ کردیا۔
غیرملکی خبررساں ادارے کی رپورٹ کے مطابق 38 سالہ ایما نامی خاتون کا برطانوی اسپتال میں 12 دن تک زیرعلاج رہنے کے بعد انتقال ہوا لیکن اس دنیا سے جاتے ہوئے وہ اپنے بچے اور شوہر کے نام ایک جملہ کہہ گئیں۔
رپورٹ کے مطابق ایما میں کووڈ19 کی سنگین نوعیت تھی جس کے باعث وہ بہ مشکل ہی آنکھیں کھول یا بات کر پارہی تھیں لیکن دنیا سے جاتے ہوئے وہ یہ محبت بھرا جملہ کہہ گئیں کہ ‘میں تم لوگوں(بیٹا اور شوہر) سے بہت پیار کرتی ہوں’۔ صرف اس جملے کے علاوہ مریضہ کوئی گفتگو نہ کرسکیں۔
مریضہ نے اسپتال سے فون کال پر صرف یہی جملہ کہا جس کے بعد ڈاکٹروں نے انہیں وینٹی لیٹر پر منتقل کردیا اور پھر بدقسمتی سے ان کی موت واقع ہوگئی۔
خاتون میں کورونا کی شدید علامات بھی تھیں۔ مریضہ کا انتقال برطانیہ کے علاقے گریٹ مانچسٹر میں قائم سیلفورڈ نامی اسپتال میں ہوا، ان کا 5 سالہ بیٹا اب والد کے ساتھ زندگی گزار رہا ہے۔
خبررساں ادارے کی رپورٹ میں کہا گیا ہے کہ 38 سالہ ٹونی نامی شوہر نے گزشتہ ماہ کرسمس کے موقع پر علامات ظاہر ہونے پر اسپتال سے رجوع کیا تھا بعد ازاں ڈاکٹروں نے ان کی بیوی کو داخل کرلیا۔ وینٹی لیٹر پر 12 دن گزارنے کے بعد وہ اس دنیا سے چلی گئیں۔ اہل خانہ شدید غم سے نڈھال ہیں۔