ایتھنز : روسی اپوزیشن رہنما الیکسی نوولنی کی گرفتاری پر یورپی یونین کی جانب سے روس پر پابندی عائد کیے جانے کا قوی امکان ہے تاہم ممبر ممالک نے روس کو ایک اور موقع فراہم کرنے کا خیال ظاہر کیا ہے۔
اس حوالے سے یونانی وزیر خارجہ نے کہا ہے کہ یورپی یونین کے خارجہ پالیسی محکمہ کے سربراہ سمیت متعدد ممبر ممالک نے روس کو ایک اور موقع دیے کا مشورہ دیتے ہوئے کہا ہے کہ ہم اگلے ایک ماہ میں اس پر غور کریں گے۔
غیر ملکی خبر رساں ادارے کے مطابق یوروپی یونین نے کہا ہے کہ وہ روس میں حزب اختلاف کے رہنما الیکسی نوولنی کی گرفتاری کے بعد پیدا ہونے والی صورتحال کی نگرانی کر رہا ہے، جس کے لئے فروری میں روس پر پابندی عائد ہوسکتی ہے۔ یہ بات یونان کے وزیر خارجہ نکوس ڈینڈیاس نے بدھ کے روز ایک انٹرویو میں کہی۔
نکوس ڈنڈیاس نے میڈیا کو دیئے گئے ایک انٹرویو میں کہا کہ یورپی یونین کے متعدد ممبر ممالک نے نوولنی کے حوالے سے روس پر پابندی عائد کرنے کا مطالبہ کیا تھا لیکن اس کے باوجود یوروپی یونین اب تک روسی حکام پر پابندی عائد کرنے سے گریز کرتا رہا ہے۔
یونانی وزیر خارجہ نے کہا کہ یوروپی یونین کے خارجہ پالیسی محکمہ کے سربراہ جوزیف بوریل سمیت متعدد ممبر ممالک نے روس کو اس معاملے میں ایک اور موقع دینے کا خیال ظاہرکیا ہے، ہم آئندہ 30 دنوں میں اس مسئلے پر غور کریں گے۔
