نیو شیرون : امریکی ریاست مہاسکا کاؤنٹی کے شہر نیو شیرون میں قتل اور خودکشی کا واقعہ پیش آیا ہے، خاتون کو اس کے ساتھی نے قتل کرکے خود کشی کرلی۔
واقعے کی اہم بات یہ بھی ہے کہ تین سال قبل مقتولہ کے والدین کی موت بھی اسی انداز میں ہوئی تھی اس کے والد نے بھی بیوی کو گولی مار اپنی زندگی کا خاتمہ کرلیا تھا۔
غیر ملکی خبر رساں ادارے کی رپورٹ کے مطابق 25 جنوری کو 55سالہ رابرٹ ڈاپولیتو اور 42سالہ جیسکا ڈپولیٹو اپنے گھر میں مردہ پائے گئے تھے، پولیس کا کہنا ہے کہ رابرٹ نے پہلے جسیکا کو گولی ماری اور پھر خود کشی کرلی۔
پولیس کے مطابق اس جوڑے نے کبھی قانونی طور پر شادی نہیں کی تھی لیکن وہ گزشتہ بیس سال سے زیادہ عرصے تک باہمی رضامندی کے تحت ایک ہی گھر میں رہتے تھے، جیسکا نے اپنی کنیت بدل کر رابرٹ رکھ لی تھی۔ ان دونوں کے دو بچے بھی ہیں۔
اس واقعے کی مماثلت کے حوالے سے علاقہ مکینوں کا کہنا ہے کہ تین سال قبل مقتولہ جسیکا کے والدین بھی اسی طرح کی واردات میں ہلاک ہوئے تھے کہ باپ تھامس نے پہلے اپنی بیوی مشیل میسی کو گولی ماری اور پھر خود کو بھی گولی مار کر زندگی کا خاتمہ کرلیا تھا۔
اطلاعات کے مطابق واقعے کی مزید تفتیش کی جارہی ہے، پولیس حکام نے تاحال دونوں کے قتل یا خود کشی کے ممکنہ مقاصد یا وجوہات پر کوئی سرکاری بیان جاری نہیں کیا ہے۔
واضح رہے کہ بیوی کو قتل کرنے والے رابرٹ ڈپولیٹو کا ایک بھائی سال 2010 میں اپنی اہلیہ کے قتل کے الزام میں جیل میں سزا بھگت رہا ہے۔
