کراچی : پاکستانی کرکٹ ٹیم کے مڈل آرڈر بیٹسمین فواد عالم نے شائقئین کرکٹ کو اپنی بیٹنگ کے گر بتا دیئے۔ ان کا کہنا ہے آتی ہوئی بال کو دیکھ کر شاٹ کھیلنے کیلئے خود کو تیار کرتا ہوں۔
فواد عالم پہلے پاکستانی بیٹسمین ہیں جنہوں نے ملک سے باہر اپنے اولین ٹیسٹ میں سنچری اسکور کی ہے۔ دلچسپ بات یہ ہے کہ جب وہ اس سنگ میل تک پہنچے تو دوسرے اینڈ پر کپتان یونس خان ہی موجود تھے جنہوں نے خود نوسال قبل سری لنکا ہی کے خلاف اپنے اولین ٹیسٹ میں سنچری بنائی تھی۔
اپنے ایک انٹرویو میں فواد عالم نے اپنی بیٹنگ کے بارے میں بتایا کہ بالر کے بال پھینکنے کے ساتھ ہی میں اپنی پوزیشن پر آجاتا ہوں، اس کے بعد میری کوشش ہوتی ہے کہ جہاں کی بال ہے اسی جگہ پر کھیلوں۔
اس سے قبل سابق کرکٹرز رمیزراجہ اور وسیم اکرم نے بھی ان کی بیٹنگ پر تبصرہ کرتے ہوئے بتایا تھا کہ فواد عالم کس طرح بولرز کو اپنے جال میں پھنساتے ہیں۔
ایک ویڈیو میں رمیز راجہ نے بتایا کہ فواد عالم اسپن بال کا سامنا کرنے کے لیے خاص انداز میں گھومتے اور پھر دوبارہ لیگ آن پر آجاتے ہیں جبکہ فرنٹ فوٹ، مڈل اور لیگ اسٹمپ پر ہی رہتا ہے۔ اس دوران وہ گیند کو بڑے غور سے دیکھتے ہیں۔
وسیم اکرم نے کہنا تھا کہ فواد عالم کی خاصیت یہ ہے کہ وہ گیند آنے سے پہلے اپنی پوزیشن تبدیل کرچکا ہوتا ہے، ایسے بلے بازوں کو بولرز گیند کراتے ہوئے بھی بار بار سوچتے ہیں۔
واضح رہے کہ فواد عالم نے گزشتہ دنوں ہونے والے کراچی ٹیسٹ میں جنوبی افریقہ کے خلاف 109 رنز کی شاندار اننگز کھیلی تھی، اس سے قبل انہوں نے نیوزی لینڈ میں بھی سنچری اسکور کی تھی۔
