نئی دہلی: بھارت میں کسان تحریک کا معاملہ کرکٹ ٹیم کے ڈریسنگ روم تک پہنچ گیا۔
بھارتی میڈیا رپورٹس کے مطابق انگلینڈ کے خلاف پہلے ٹیسٹ میچ سے قبل کپتان ویرات کوہلی نے پریس کانفرنس میں بتایا کہ ٹیم میٹنگ میں کسان تحریک کے بارے میں بات چیت ہوئی تھی جس میں سبھی نے اپنی اپنی رائے کا اظہار کیا۔
ویرات کوہلی نے کل سے شروع ہونے والے پہلے ٹیسٹ کی حکمت عملی اور دیگر موضوع پر منعقد پریس کانفرنس میں یہ باتیں بتائیں۔
ویرات کوہلی نے کسان تحریک پر اس وقت گفتگو کی جب صحافی نے کوہلی سے ان کے ٹویٹ کے بارے میں پوچھا جس میں انہوں نے کسانوں کے احتجاج کے بارے میں لکھا تھا۔
بھارتی کپتان نے لکھا تھا کہ اختلاف کے اس وقت ہم سب متحد رہیں، کسان ہمارے ملک کا اٹوٹ حصہ ہیں، مجھے یقین ہے کہ تمام فریقین کے مابین دوستانہ حل نکالا جائے گا۔
Let us all stay united in this hour of disagreements. Farmers are an integral part of our country and I'm sure an amicable solution will be found between all parties to bring about peace and move forward together. #IndiaTogether
— Virat Kohli (@imVkohli) February 3, 2021
ویرات کوہلی نے بتایا کہ ٹیم میٹنگ میں کسانوں کے نئے زرعی قوانین کے خلاف احتجاج پر تبادلہ خیال کیا گیا جس میں تمام کھلاڑیوں نے اپنی اپنی رائے پیش کی۔
واضح رہےکہ بھارت میں زرعی اصلاحات کے معاملے پر کسانوں کا احتجاج 5 ماہ سے جاری ہے اور ہزاروں کسانوں نے بھارتی دارالحکومت نئی دہلی کے مختلف علاقوں میں دھرنے دے رکھے ہیں جب کہ 26 جنوری کے روز کسانوں اور پولیس کے درمیان شدید تصادم بھی ہوا تھا، کسانوں کا دعویٰ ہے کہ 26 جنوری سے اب تک 100 سے زیادہ مظاہرین لاپتہ ہیں۔
