راچڈیل : برطانیہ میں واقع دریائے ٹیمز کا ایک حصہ شدید سردی کے باعث 60 سال میں پہلی بار جم گیا، برطانیہ میں ہونے والی شدید برفباری اور طوفانی ہواؤں نے سردی کی شدت میں ریکارڈ اضافہ کردیا ہے۔
شدید سرد موسم کے باعث عوام کو مشکلات کا سامنا کرنا پڑرہاہے متعلقہ حکام کی جانب سے عوام کو غیر ضروری سفر سے گریز اور احتیاطی تدابیر اپنانے کی سختی سے ہدایت کی گئی ہے، جبکہ اسکول میں بھی تعطیلات کر دی گئی ہیں۔
غیر ملکی خبر رساں ادارے کی رپورٹ کے مطابق کچھ علاقوں کا درجہ حرارت منفی 20 ڈگری سینٹی گریڈ تک بھی ریکارڈ کیا گیا ہے۔ برطانیہ میں پڑنے والی سردی نے گزشتہ کئی سالوں کے ریکارڈ توڑ دیے ہیں۔
غیرملکی خبر رساں ایجنسی کے مطابق برطانیہ میں واقع دریائے ٹیمز اس سے قبل1963 کی سردیوں میں جم گیا تھا تاہم اب 60 سال بعد ایک بار پھر حالیہ سردیوں میں دریا کا ایک حصہ جم گیا ہے جو پرندوں کے لیے اسکیٹنگ کا منظر پیش کر رہا ہے۔
لندن میں مقیم ایک شہری کا کہنا تھا کہ میں یہاں13 سال سے مقیم ہوں لیکن میں نے اس دریا کو کبھی جمتے ہوئے نہیں دیکھا یہ میرے لیے انتہائی حیران کن ہے۔ دریائے کے جمنے والے حصے میں دریا کا بہاؤ انتہائی آہستہ ہوتا ہے۔
