لندن: برطانیہ میں مقامی و بین الاقوامی سفر کے لیے ویکسین پاسپورٹ جاری کرنے پر غور کیا جا رہا ہے۔
تفصیلات کے مطابق برطانوی وزیر خارجہ ڈومینک راب نے میڈیا سے گفتگو میں کہا کہ وزرا ویکسین پاسپورٹ کے اجرا کی تجویز کا جائزہ لے رہے ہیں۔
ڈومینک راب نے بتایا کہ اگر یہ تجویز منظور ہوتی ہے تو پھر مسافروں کو سفر کے لیے کرونا ویکسین پاسپورٹ دکھانا ہوگا۔
ادھر سابق برطانوی وزیر اعظم ٹونی بلیئر نے بھی حکومت سے ویکسین پاسپورٹ کا مطالبہ کر دیا ہے، اور کہا ہے کہ برطانیہ آگے بڑھ کر ویکسین پاسپورٹ کے معاملے میں دنیا کی قیادت کرے۔
دوسری طرف برطانیہ میں ڈیڑھ کروڑ افراد کو کرونا ویکسین لگانے کا سنگ میل عبور کر لیا گیا ہے، ویکسین منسٹر ندیم ضحاوی نے ایک بیان میں کہا ایک دن پہلے ہی 15 ملین افراد کو پہلی ڈوز لگانے کا ہدف حاصل کر لیا.
15,000,000! Amazing team ❤️ We will not rest till we offer the vaccine to the whole of phase1 the 1-9 categories of the most vulnerable & all over 50s by end April and then all adults. @NikkiKF @Emily_JR_Lawson @Comd101LogBde 💉💉💉 https://t.co/NqOZl5e0aG
— Nadhim Zahawi (@nadhimzahawi) February 14, 2021
ندیم ضحاوی نے کہا پہلے مرحلے میں 4 گروپس کو ویکسین لگانے کا ہدف مقرر کیا گیا تھا، اپریل کے آخر تک 50 برس سے زائد عمر کے افراد کو ویکسین لگائی جائے گی۔
برطانوی وزیر اعظم بورس جانسن نے اسے ایک اہم سنگ میل اور ایک غیر معمولی کارنامہ قرار دیا، انھوں نے کہا کہ ہم نے برطانیہ میں پہلے چار ترجیحی گروپس میں ہر ایک کو ویکسین لگا دی ہے، یہ وہ لوگ ہیں جنھیں کرونا وائرس سے سب سے زیادہ بیماری کا خطرہ لاحق تھا۔
یاد رہے کہ برطانیہ میں کرونا ویکسین کی پہلی ڈوز 8 دسمبر کو 90 سالہ شخص کو دی گئی تھی۔
